Մոսկվան կարեւոր է համարում Լեռնային Ղարաբաղի շփման գծում իրավիճակն ավելի խաղաղ դարձնելը: Այս մասին 2017 թվականին ռուսական դիվանագիտական աշխատանքների արդյունքների վերաբերյալ ամենամյա մամուլի ասուլիսում ասել է ՌԴ ԱԳ նախարար Սերգեյ Լավրովը, փոխանցում է ՏԱՍՍ-ը:
«Կարծում եմ, որ հիմա կարեւոր կլիներ լրացուցիչ քայլերի ձեռնարկումը, որպեսզի շփման գծում [Լեռնային Ղարաբաղում], այնուամենայնիվ, ավելի խաղաղ լիներ, ինչը կօգներ քաղաքական կարգավարմանն անցնելուն»,- հայտարարել է Լավրովը:
«Այս խնդիրը մեկ փաստաղթով չես լուծի,- վստահ է ՌԴ ԱԳ նախարարը: - Փուլային մոտեցում է հարկավոր, որը կարտացոլի այս պահին հնարավոր համաձայնությունը եւ կորոշի այն հարցերի ուղղությամբ աշխատանքի ճանապարհները, որոնք լրացուցիչ քննարկումներ են պահանջում վերջնական կարգավորման, ներառյալ Լեռնային Ղարաբաղի կարգավիճակի հարցում ձեռքբերումների շահերի շրջանակում»:
Նա նշել է, որ հակամարտության կարգավորման ուղղությամբ դիվանագետներն իրականացրել են ինտենսիվ եւ պարբերական աշխատանք: Լավրովն ընդգծել է, որ Ռուսաստանը չի կարող այս հակամարտության կոնկրետ ծրագրեր ունենալ, «քանի որ խնդիրը կարող են լուծել միայն կողմերն իրենք»:
ՌԴ ԱԳ նախարարի խոսքով՝ Ռուսաստանը գործընթացի մյուս մասնակիցների հետ նման կարգավորման համար պայմաններ է ստեղծում՝ համեմատելով կողմերի դիրքորոշումները համընկնող մոտեցումներ գտնելու համար եւ ձգտելով «հուշել այն փոխզիջումները, որոնք կարող են կողմերին ընդհանուր հայտարարի բերել այն հարցերում, որոնցով մինչեւ հիմա տարաձայնություններ ունեն»: «Մենք սպասում ենք, որ 2 երկրներից էլ ինչ-որ դրական ազդակներ կստացվեն»,- հավելել է նա: