Ռեժիսոր Կիրիլ Սերեբրենիկովին, որին մեղադրում են խոշոր խարդախության կազմակերպման մեջ, սպառնում է 10 տարվա ազատազրկում
«ՌԻԱ Նովոստի»-ին փաստաբան Իրինա Պովերինովան պատմել է, որ Քննչական կոմիտեն «յոթերորդ ստուդիայի» գործով ավարտել է Սերեբրենիկովի եւ մյուսների հարցով հետաքննությունը:
Իրավիճակին տեղյակ աղբյուրի համաձայն՝ այն հոդվածը, որով մեղադրում են Սերեբրենիկովին, վերջնական տարբերակում փոփոխություն չի կրել, խոսքը հափշտակության մասին է: Միեւնույն ժամանակ, Պովերինովան նշել է, որ հայտարարված տույժը կրկնապատկվել է՝ 68-ից հասնելով 133 մլն ռուբլիի:
Այս հանցագործությունը պատժվում է մինչեւ 10 տարվա ազատազրկմամբ՝ մեկ միլիոն կամ ավելի գումար տուգանքով։
Սերեբրենիկովի եւ նրա ղեկավարած «Գոգոլի կենտրոն» թատրոնում խուզարկություն են իրականացվել անցյալ տարվա մայիսին։Քննչական ծառայությունից կասկածում են, որ թատրոնի աշխատակիցները գողացել են պետության կողմից «Պլատֆորմ» ծրագրի իրականացման համար հատկացված միջոցները:
Հետաքննության տվյալներով՝ Մշակույթի նախարարությունը «Յոթերորդ ստուդիային» (Սերեբրենիկովի կողմից հիմնադրված ծրագիր) մի քանի տասնյակ միլիոն ռուբլի է տրամադրել ներկայացումների եւ շրջագայությունների համար: Մեղադրյալները գողացել են գումարը կեղծ փաստաթղթերով, մասնավորապես` «Ամառային գիշերվա երազ» (Сон в летнюю ночь) ներկայացման կազմակերպման մասին:
Բացի Սերեբրենիկովից՝ գործով մեղադրանք է առաջադրվել Ռուսաստանի ակադեմիական երիտասարդական թատրոնի տնօրեն Սոֆյա Ափֆելբաումին, «Յոթերորդ ստուդիայի» տնօրեն Յուրի Իտինին, «Գոգոլ-կենտրոն»-ի նախկին տնօրեն Ալեքսեյ Մալոբրոդսկու եւ հաշվապահ Նինա Մասլյաեւային:
Բոլորը, բացի Մասլյաեւայից, իրենց մեղավոր չեն ճանաչում: Հաշվապահը ցուցմունք է տվել մյուս մեղադրյալների դեմ: Հոկտեմբեր ամսվա սկզբին Մասլյաեւայի համար տնային կալանք է նշանակվել, իսկ նրա գործը առանձնացվել է։