«Վիրավոր զինվորի բուժման համար հանգանակություն նախաձեռնելու Վիգեն Սարգսյանի որոշումն ինքնին տարօրինակ է, պատկերացրեք՝ վաղն էլ Սերժ Սարգսյանը գրի, որ փող հավաքենք, որ 80-ականների զենքերի տեղը 90-ականների զենք գնենք»: Այս մասին այսօր՝ հունվարի 15-ին ԱԺ-ում հրավիրած ասուլիսում հայտարարել է «Ելք» խմբակցության ղեկավար Նիկոլ Փաշինյանը:
«Կառավարությունը բոլոր լծակներն ունի, որ այդ գումարը հավաքի, ես ինքս կողմ եմ քվեարկել 1000 դրամների օրենքին՝ նաեւ նման իրավիճակը հաշվի առնելով: Իհարկե, դեպքը, որի մասին խոսվում է, ուժի մեջ է մտել մինչեւ այդ հիմնադրամի ստեղծումը, բայց Կառավարությունն ունի պահուստային ֆոնդ, նաեւ պաշտոնյաների թանկարժեք տները կան»,-ասել է Նիկոլ Փաշինյանը:
Հիշեցնենք՝ Հայաստանի պաշտպանության նախարար Վիգեն Սարգսյանը վիրավոր զինծառայող Ալբերտ Դալլաքյանի վիրահատության համար դրամահավաքին էր միացել՝ ֆեյսբուքյան իր էջում գրելով. «Ես եմ խորհուրդ տվել ընտանիքին փորձել նման դրամահավաքի միջոցով հավաքել անհրաժեշտ գումարը: Ես անձամբ եւ իմ մի քանի ընկեր կտրամադրենք պահանջվող գումարի ($45.000) 10 տոկոսը: Կոչ եմ անում բոլորիդ, ով կարող է միանանք այս դրամահավաքին եւ օր առաջ օգնենք Ալբերտի ընտանիքին հավաքել անհրաժեշտ գումարը»: Պաշտպանության նախարարի այս կոչը քննադատության արժանացավ հանրության կողմից: