Հարավային Ուելսի Քարդիֆ համալսարանի բրիտանացի հոգեբան Մարտին Գրաֆը Daily Telegraph թերթին պատմել է, թե ինչպիսի բացասական հետեւանքներ կարող են ունենալ ռոմանտիկ հարաբերությունների վրա սոցիալական ցանցերի միջոցով միկրոդավաճանությունները:
Միկրոդավաճանությունը բարեկամության եւ դավաճանության միջեւ «գորշ գոտին» է: Urban Dictionaries-ում այն սահմանվում է՝ «երբ որեւէ մեկը դավաճանում է իր կողակցին, բայց միայն մի քիչ»:
Գրաֆը բացատրել է, թե սոցիալական ցանցերում որ գործողություններ կարելի է համարել միկրոդավաճանություն:
«Դա կարող է շատ պարզ բան լինել, օրինակ՝ Instagram-ում պարբերաբար որեւէ մեկի գրառումները հավանելը կամ մեկի Facebook-ի էջը մեկնաբանելը»,-պարզաբանել է նա:
Այլ օրինակների թվում են նաեւ՝ նախկին սիրեցյալի էջերը դիտելը, սրտերի կամ ծաղիկների տեսքով էմոջիներ ուղարկելու սովորությունը մեկին, որը ձեր կողակիցը չէ, ինչ-որ մեկի Instagram-ն անընդհատ ստուգելու անհրաժեշտությունը եւ այլ նմանատիպ գործողություններ:
«Մարդկային շփման եւ հարաբերությունների պատմության տեսանկյունից սա լրիվ նոր բան է»,-հայտնել է Գրաֆը: Նրա խոսքով՝ հետազոտությունները ցույց են տալիս, որ որքան ավելի հաճախ են մարդիկ սկսել օգտվել սոցիալական ցանցերից, այնքան աճել է զույգերի միջեւ վիճաբանությունները:
Գրաֆը ուշադրություն է հրավիրել սոցիալական ցանցերի հետ կապված մեկ այլ նրբության վրա՝ հիմա ավելի հեշտ է հետեւել կողակցի գործողություններին, քան նախկինում: «Facebook-ի կամ Instagram-ի նման կայքերում ներգրավելու համար հատուկ ջանքեր չեն պահանջվում»,-նշել է հոգեբանը, հաղորդում է «ՌԻԱ Նովոստի»-ն: