Ազգային ժողովում մեկնարկել է այս տարվա առաջին քառօրյան: Քննարկումների գլխավոր թեման թանկացումներն են եղել: Նիստի մեկնարկին Արա Բաբլոյանը հայտարարել է, որ հունվարի 23-ին խորհրդարանական լսումներ են անցկացվելու. քննարկելու են թանկացումների պատճառներն ու գնաճը մեղմելու հնարավորությունները: Նիկոլ Փաշինյանը հետաքրքրվել է. ճի՞շտ հասկացավ, որ լսումները հանրապետության նախագահի հանձնարարականով են կազմակերպվում:
Էդմոն Մարուքյանն էլ տարակուսել է, որ խորհրդարանական մեծամասնությունը զարմացած է թանկացումներից եւ միայն հիմա է որոշել անդրադառնալ խնդրին: Պատգամավորն առաջարկում է Հարկային օրենսգիրքն օրակարգ բերել եւ փոփոխություններ կատարել դրանում: Իսկ Արամ Սարգսյանին օրենսգիրքը «Չարի վերջն» է հիշեցրել: Թանկացումների հարցով լսումների նախաձեռնությունը «Ելք»-ն անիմաստ է համարում: Փոխարենը խմբակցության պատգամավորները ժողովրդին կոչ են անում հունվարի 19-ին փողոց դուրս գալ եւ մասնակցել իրենց կազմակերպած երթին, որովհետեւ, Մարուքյանի խոսքով, խորհրդարանական հարթակում խնդրի մասին բարձրաձայնելու բոլոր ուղիները սպառվել են: Պատգամավոր Սեյրան Սարոյանը փողոց դուրս գալը լավ գաղափար չի համարում:
Լրագրողները Սարոյանին նաեւ հարցրել են Վիգեն Սարգսյանի նախաձեռնության մասին. պաշտպանության նախարարը միացել էր վիրավոր զինծառայող Ալբերտ Դալլաքյանի վիրահատության համար դրամահավաքին՝ ֆեյսբուքյան իր էջում գրելով, որ ինքն է խորհուրդ տվել Դալլաքյանի ընտանիքին դրամահավաք սկսել եւ բոլորին կոչ էր արել միանալ նախաձեռնությանը: Սա քննադատության ալիք էր բարձրացրել: Սեյրան Սարոյանը Վիգեն Սարգսյանի պաշտպանի դերն է ստանձնել եւ հորդորել է հանգիստ թողնել երիտասարդ նախարարին: Նիկոլ Փաշինյանն էլ վիրավոր զինվորի համար հանգանականություն նախաձեռնելու՝ նախարարի որոշումը տարօրինակ է համարում:
Հայաստանի նախագահի ընտրությունը, ամենայն հավանականությամբ, տեղի կունենա մարտի 2-ին: Վահրամ Բաղդասարյանը լրագրողներին ասել է, որ արդեն այս շաբաթ Հանրապետական կուսակցությունը կսկսի քննարկել նախագահի թեկնածուի հարցը:
Հավելենք, որ Ազգային ժողովն այսօր նաեւ ահաբեկչական խմբավորումների կողմից Իրաքում եզդի ժողովրդի նկատմամբ 2014 թվականին իրականացված ցեղասպանության դատապարտման մասին հայտարարության նախագիծ է քննարկել: Էդուարդ Շարմազանովը խորհրդանշական է համարում, որ հարցը քննարկվում է հենց այս տարի:
Վրաստանում հայ գործարար է հարձակման ենթարկվել: Օզուրգեթի քաղաքում անհայտ անձինք հարձակվել են 31-ամյա Արթուր Սուքիասյանի վրա եւ խոշոր չափի կանխիկ գումար հափշտակել՝ շուրջ 12 հազար դոլար: Տուժածը Հայաստանի քաղաքացի է, Վրաստանի Գուրիայի շրջանում մի քանի խանութ ունի: Սուքիասյանին հիվանդանոց են տեղափոխել: Բժիշկների խոսքով՝ նրա կյանքին վտանգ չի սպառնում, մասնագետների մշտական հսկողության ներքո է: Ըստ տեղեկությունների՝ Արթուր Սուքիասյանի վրա դիմակավորված երկու տղամարդ հարձակվել են շենքի մուտքում, բութ առարկայով հարվածել գլխին եւ հափշտակել գումարը: Ենթադրյալ չարագործներին դեռեւս չեն հայտնաբերել:
Պերմի դպրոցներից մեկում արտակարգ դեպք է տեղի ունեցել. դանակով զինված երկու դեռահասներ ներխուժել են դասասենյակներից մեկն ու հարձակվել ուսուցչի, ապա նաեւ աշակերտների վրա: Միջադեպի հետեւանքով ուսուցիչն ու 11 աշակերտներ հիվանդանոց են տեղափոխվել: Տուժածների թվում նաեւ ազգությամբ հայ աշակերտ կա՝ 10-ամյա Մենուա Աբրոյանը: Միջադեպի մեղավորները ձերբակալված են: Ըստ տեղեկությունների՝ պատանիներից մեկը նախկինում հաշվառված է եղել հոգեբուժական դիսպանսերում:
Թուրքիայում անչափահասների մասնակցությամբ պոռնոֆիլմ ներբեռնելու կասկածանքով հայ երիտասարդ է ձերբակալվել: Պոռնոֆիլմի ներբեռնումը ֆիքսել է ամերիկյան մի կազմակերպություն եւ համակարգչի IP հասցեն տրամադրել թուրքական ոստիկանությանը: Իրավապահները ձերբակալել են Ստամբուլի համալսարանի բժշկական ֆակուլտետում սովորող 24-ամյա ուսանողի. նա Հայաստանի քաղաքացի է: Հայկական կողմը փորձում է պարզել դեպքի մանրամասները:
Ստամբուլի փողոցներից մեկը վերանվանվել է հայտնի հայ լուսանկարչի անունով. Բեյօղլուի Թոսբողա փողոցն արդեն պաշտոնապես Արա Գյուլերի անունն է կրում: «Դարի լավագույն լուսանկարիչ» ճանաչված Արա Գյուլերը, որին նաեւ «Ստամբուլի աչք» են կոչում, լրագրողական գործունեությունը սկսել է 1950-ին, Ստամբուլի պարբերականներից մեկում: Լուսանկարիչը բազմաթիվ մրցանակների եւ տիտղոսների է արժանացել Թուրքիայում եւ միջազգային տարբեր կազմակերպությունների կողմից: Արա Գյուլերը լուսանկարել է մի շարք հայտնի քաղաքական գործիչների, արվեստագետների, այդ թվում՝ Ուինսթոն Չերչիլին, Առնոլդ Թոյնբիին, Պիկասոյին, Դալիին եւ այլոց:
Մոսկվայում վախճանվել է քաղաքական գործիչ, գիտնական Միխայիլ Մինասբեկյանը: Նա 84 տարեկան էր: Մինասբեկյանը Հայաստանի ավիացիոն արդյունաբերության հիմնադիրն էր, «Արմավիակոմպլեքս» արդյունաբերական միավորման հիմնադիրն ու գլխավոր տնօրենը, Ռուսաստանի բնական գիտությունների եւ Հայաստանի ճարտարագիտական ակադեմիաների ակադեմիկոս: Գիտնականին հողին կհանձնեն Հայաստանում:
Վերին Լարսը նորից փակվել է: Վրացական աղբյուրների փոխանցմամբ՝ Ստեփանծմինդա-Լարս ավտոճանապարհը փակ է բոլոր տեսակի ավտոմեքենաների համար: Հյուսիսային Օսիայից էլ հաղորդում են, որ ռուսական կողմում 267 տրանսպորտային միջոց կա կուտակված, որից 210-ը բեռնատար, 57-ը՝ մարդատար մեքենաներ են: Հայաստանի տարածքում փակ ճանապարհներ չկան, բայց որոշները դժվարանցանելի են: Սիսիան-Գորիս ավտոճանապարհին տեղ-տեղ մերկասառույց է, իսկ Գորիս-Կապան հատվածում մառախուղ է:
Հունվարի 15-ին դոլարն էժանացել է, եվրոն՝ թանկացել: Դոլարի փոխարժեքը կազմել է 483 դրամ, եվրոյինը՝ 592, ռուբլունը՝ 8 դրամ 57 լումա, ֆունտինը՝ 666 դրամ:
Հունվարի 16-ին հանրապետության առանձին շրջաններում թույլ տեղումներ են սպասվում: Օդի ջերմաստիճանն էապես չի փոխվի: Երեւանում նույնպես տեղումներ կլինեն, գիշերը՝ թաց ձյան տեսքով: Մայրաքաղաքում գիշերը կդիտվի -1+1, ցերեկը՝ +4+6 աստիճան տաքություն:
