Տեխնիկական խնդիրների պատճառով «Ելք»-ի գրությունը պարոն Ծառուկյանին չի փոխանցվել: Այս մասին NEWS.am-ի հետ զրույցում ասել է «Ծառուկյան» խմբակցության պատգամավոր Վահե Էնֆիաջյանն՝ անդրադառնալով «Ելք» խմբակցության ղեկավար Նիկոլ Փաշինյանի հայտարարությանը:
Նշենք, որ ԲՀԿ առաջնորդ Գագիկ Ծառուկյանը հայտարարել էր, թե «Ելք»-ի նախագահի թեկնածուին սատարելու առաջարկ իրենք չեն ստացել, մինչդեռ Նիկոլ Փաշինյանն այսօր հրավիրված ասուլիսում պնդեց, թե անձամբ է Վահե Էնֆիաջյանի ձեռքին տեսել էլեկտրոնային փոստով խմբակցությանն ուղարկված առաջարկի տպագիր տարբերակը:
«Այո, զուտ տեխնիկական խնդիրների պատճառով գրությունը պարոն Ծառուկյանին չի փոխանցվել, բայց ուզում եմ նաեւ հավելել, որ առհասարակ, երկրում քաղաքական-հասարակական գործընթացների վերաբերյալ պարոն Ծառուկյանը իրազեկված է եւ պատահական չէ, որ Գյումրի քաղաքում պարոն Ծառուկյանը հայտարարությամբ հանդես եկավ եւ նախագահի թեկնածության մասնակցության հետ կապված դիրքորոշում ու կարծիք հայտնեց»,-ասել է Վահե էնֆիաջյանը՝ նշելով, որ հետեւանքից բացի պետք է խոսել նաեւ պատճառի մասին:
«Եթե խոսում ենք միասնական թեկնածուով հանդես գալու գաղափարի մասին, առհասարակ, տեղին կլիներ վերադառնալ հիմնախնդրի ակունքներին եւ մատնանշել, եթե ցանկություն կար միասնական ձեւով հանդես գալու, պետք է ոչ թե որոշում կայացնել, թեկնածու ներկայացնել, այլ առհասարակ պետք գործընկերների հետ ի սկզբանե քննարկել միասնական թեկնածուով հանդես գալու հնարավարության հարցը»: