Մեկ միասնական երթուղային ցանցի ստեղծումը իրապես ռիսկային է, հատկապես, որ մեկ օպերատորի դեպքում հնարավոր է ուղեվարձի թանկացում: Այս մասին, այսօր՝ հունվարի 16-ին, ԱԺ-ում «Ավտոմոբիլային տրանսպորտի մասին» Հայաստանի Հանրապետության օրենքում փոփոխություններ կատարելու մասին» օրենքի նախագծի առաջին ընթերցմամբ քվեարկության ժամանակ նշել է «Ծառուկյան» խմբակցության պատգամավոր Նաիրա Զոհրաբյանը՝ հավելելով, որ այս փուլում իրենք ձեռնպահ կքվեարկեն՝ ներկայացնելով մեր առաջարկները, իսկ եթե այդ առաջարկները չընդունվեն, երկրորդ ընթերցման ժամանակ դեմ են քվեարկելու:

Իր հերթին, «Ելք» խմբակցության պատգամավոր Արամ Սարգսյանը նշեց, որ իրենք դեմ են քվեարկելու օրինագծին, քանի որ կարծում են, որ որակ եւ մրցակցություն կարող է ապահովել միայն ազատ շուկան:

Ի վերջո, օրինագիծն ընդունվեց 59 կողմ, 7 դեմ 7, 27 ձեռնպահ ձայներով:

Ավելի վաղ NEWS.am-ը հայտնել էր, որ «Ավտոմոբիլային տրանսպորտի մասին» ՀՀ օրենքում փոփոխություններ կատարելու մասին նախագծով նախատեսվում է ստեղծել մեկ միասնական երթուղային ցանց: Տրանսպորտի, կապի եւ տեղեկատվական տեխնոլոգիաների նախարարի առաջին տեղակալ Գագիկ Գրիգորյանի խոսքով, այս փաստաթուղթը նախատեսում է միավորել միջմարզային եւ ներմարզային երթուղային ցանցերը եւ դա վերապահել տրանսպորտի, կապի եւ տեղեկատվական տեխնոլոգիաների նախարարությանը: Նա հավաստիացրեց, որ նոր ցանցն ընդգրկելու է բոլոր բնակավայրերը. «Իհարկե, կլինեն համայնքներ, որոնք օրական 1-2 անգամ կսպասարկվեն, մյուսները ավելի շատ: Մեր նպատակը արժանավայել փոխադրում ապահովելն է: Ցանցը կունենա միասնական օպերատոր, միասնական տոմսային համակարգ»,-նշել էր նա:

Ինչ վերաբերում է ուղերվարձի փոփոխությանը, փոխնախարարը նշել էր, որ ամեն ինչ կանեն, որ թանկացում չլինի. «Վառելիքի գինը տեսակարար մեծ կշիռ ունի ինքնարժեքում: Դրա ազդեցության չափը կախված կլինի նրանից, թե մինչեւ հիմա գործող սակագները որքանով էին վերադարձնում ներդրողի կամ փոխադրողի ծախսերը: Եթե դրանք զրոյի մակարդակում էին գտնվում, ապա գները կունենան բարձրանալու միտում»:

Միասնական երթուղային ցանց է ստեղծվում. սակագինը կարող է բարձրանալ. փոխնախարար