ՏՄՊՊՀ ուսումնասիրությունների համաձայն, նախորդ տարեվերջից միջազգային շուկայում նկատվել է կարագի գնի գնանկում: Այս մասին այսօր՝ հունվարի 16-ին լրագրողների հետ հանդիպմանը ասաց Տնտեսական մրցակցության պաշտպանության պետական հանձնաժողովի նախագահ Արտակ Շաբոյանը:
Նրա խոսքով, քանի որ կարագի հիմնական մասը ներմուծվում է Նոր-Զելանդական Fonterra ընկերությունից, ապա Հանձնաժողովը դիտարկում է հենց այդ ընկերության վաճառքի գների փոփոխությունները։ «Միջազգային վաճառքի գների դիտարկումները ցույց են տալիս, որ նոր-զելանդական կարագի գները սկսել են բարձրանալ 2016 թվականի մայիսից, որի ազդեցությունը ՀՀ կարագի շուկայում արձանագրվել է 4 ամիս անց՝ սեպտեմբերից: Fonterra ընկերության կարագի վաճառքի ամենաբարձր գինը 2016-2017 թթ ընթացքում հաստատվել է 2017-ի հուլիսին՝ 1 տոննան շուրջ 6000 ԱՄՆ դոլար, որի ազդեցությունը ՀՀ կարագի մանրածախ շուկայում արձանագարվել է 2017 թվականի նոյեմբերին՝ 1կգ շուրջ 4520 դրամ»,- ասել է Շաբոյանը:
ՏՄՊՊՀ նախագահը նշեց, որ սկսած նախորդ տարվա նոյեմբերից, կարագի մանրածախ վաճառքի գները կայունացել են՝ անգամ արձանագրվել է փոքր գնային նվազեցում: «Ակնկալում ենք, որ միջազգային շուկայում կարագի գների նվազումը, հաշվի առնելով նաև ժամանակային լագը, առաջիկա 2-3 ամիսների ընթացքում կանդրադառնա նաև տեղական շուկայի վրա»,- ասել է Շաբոյանը:
