Հունվար ամսին բենզինի, դիզելային վառելիքի եւ սեղմված գազի գնի բարձրացումը լիովին համահունչ է հարկային փոփոխություններին: Այս մասին հունվարի 16-ին լրագրողների հետ հանդիպման ժամանակ հայտարարեց Հայաստանի Հանրապետության Տնտեսական մրցակցության պաշտպանության պետական հանձնաժողովի (ՏՄՊՊՀ) նախագահ Արտակ Շաբոյանը` ներկայացնելով սոցիալական նշանակության ապրանքների շուկայի մոնիտորինգի արդյունքները:
Նա նշել է, որ նոր Հարկային օրենսգրքի ուժի մեջ մտնելուց հետո բենզինի գինը բարձրացել է 20 դրամով, դիզելային վառելիքինը` 60 դրամով, իսկ սեղմված գազի 1 խորանարդ մետրի գինը՝ 20 դրամով: Մասնավորապես, 1 տոննա բենզինի ներկրման ակցիզային հարկը հունվարի 1-ից 25 հազար դրամից բարձրացել է մինչեւ 40 հազար դրամ: Միեւնույն ժամանակ, ակցիզային հարկի եւ ավելացված արժեքի հարկի (ԱԱՀ) չափը 120 հազար դրամից բարձրացել է մինչեւ 135 հազար դրամ, ինչը, իր հերթին, ազդել է վերջնական գնի վրա:
ՏՄՊՊՀ-ի ղեկավարը հիշեցրել է, որ դիզելային վառելիքի ներմուծումն ու օտարումը նախկինում ԱԱՀ-ով հարկված չէին, ընդ որում, 1 տոննա դիզվառելիքի ակցիզային հարկը 35 հազար դրամ էր: Հունվարի 1-ից ակցիզային հարկը նվազել է մինչեւ 13 հազար դրամ, սակայն այս ապրանքի դեպքում սկսել է ԱԱՀ-ը գործել, ինչը հանգեցրել է գների բարձրացմանը 60 դրամի չափով:
Ինչ վերաբերում է սեղմված գազին, ապա, ըստ Շաբոյանի, ակցիզային հարկը 8.830 դրամից բարձրացվել է մինչեւ 25 հազար դրամ, այսինքն ավելացել է 16.670 դրամով: Եթե դրան ավելացնել ԱԱՀ-ի գումարը, ապա ստացվում է, որ վառելիքի այս տեսակի հարկերը ավելացել են 20 հազար դրամով:
«Հնարավոր չարաշահումներից խուսափելու համար հանձնաժողովն ամեն օր մոնիտորինգ է իրականացնում այն շուկաներում, որտեղ գործում են գերիշխող դիրք ունեցող խաղացողները, եւ եթե այդպիսիք հայտնաբերվեն, մենք համապատասխան քայլեր կձեռնարկենք», - վստահեցրեց պաշտոնյան:
NEWS.am-ի թղթակցի հարցին, թե արդյոք հանձնաժողովը ուսումնասիրություններ է անցկացրել վառելիքի շուկաների գերիշխողների միջեւ կարտելային գործարքների բացահայտման ուղղությամբ, պաշտոնյան պատասխանել է, որ մեղադրանքների համար որեւէ ապացույց եւ հիմք չկա:
Հիշեցնենք, որ հունվարի 1-ից ուժի մեջ են մտել ՀՀ Հարկային եւ Մաքսային նոր օրենսգրքերը, որոնք որոշ ապրանքատեսակների հարկային դրույքաչափերի փոփոխություն են նախատեսում:
