«Ելք» դաշինքը բոլորին կոչ է անում միասին դուրս գալ պայքարելու։ Այս մասին այսօր՝ հունվարի 16-ին ԱԺ-ում լրագրողների հետ զրույցում հայտարարել է ԱԺ «Ելք» խմբակցության պատգամավոր Էդմոն Մարուքյանը` անդրադառնալով գազի թանկացման դեմ այսօր վարորդների բողոքի ակցիային:
«Մենք բոլորին կոչ ենք անում միասին դուրս գալ պայքարելու: Առանձին պայքարը, եթե առանձին վարորդները, առանձին ուղեւորները պայքարեն, դա արդյունք չի տալու»,- նշել է Մարուքյանը:
Ըստ նրա` երթի մասին «Ելքի» ծանուցումը քաղաքապետարանն ի գիտություն է ընդունել, եւ բոլորով պետք է միասին դուրս գալ փողոց. «Միայն այդ դեպքում իշխանությունները կգնան զիջումների, եւ Հարկային օրենսգիրքը կփոխվի»:
Մարուքյանի խոսքով` 1000 խմ սեղմված գազի ակցիզային հարկը 25 հազար դարձնելը նշանակում էր, որ այն ազդեցություն ունենալու է, եւ այսօր դա երեւում է: «Տրանսպորտը սպասարկող ընկերությունները կանգնած են շատ լուրջ խնդրի առաջ, որովհետեւ մի կողմից՝ կա քաղաքական որոշում՝ թույլ չտալ թանկացնել ուղեվարձը, բայց մյուս կողմից՝ կա հարկային փոփոխությունը, որով 3 անգամ թանկանում է ակցիզային հարկը»,- նշել է նա: Էդմոն Մարուքյանի կարծիքով` կամ տնտեսվարողները պետք է ուղեվարձը թանկացնեն, որը կրկին բողոքի ալիք կբարձրացնի, կամ գան այս շենք եւ փոխեն Հարկային օրենսգիրքը:
Ինչ վերաբերում է թանկացումների մասին ԱԺ-ում սպասվող լսումներին, պատգամավորն ասել է. «Մենք չենք ուզում լսում կազմակերպել, թե կարագն ինչու է թանկացել, որովհետեւ նորվեգացոնց հետ հարց չունենք: Լուծումն առաջարկել ենք` Հարկային օրենսգիրքը պետք է փոխել, նվազագույնը՝ ետ գալ այն նույն իրավակարգավորումներին, որ կար մինչեւ հունվարի 1-ը»:
Եթե երթի արդյունքում իշխանությունը զիջումների չգնա, ապա, Մարուքյանի խոսքով, կլինի երկրորդ, երրորդ ավելի մեծ զանգվածային միջոցառումները, կարող է ակցիա կամ ցույց լինել, չի բացառվում նաեւ նստացույցը:
«Մենք հիմա ամբողջ ուժերը կոնսոլիդացնում ենք երթի վրա եւ մեր քաղաքացիներին կրկին կոչ ենք անում գալ «Մոսկվա» կինոթատրոնի հրապարակ հունվարի 19-ին, ժամը 17-ին»,- հայտարարել է պատգամավորը: