ՏՄՊՊՀ ուսումնասիրության արդյունքներով բենզինի, դիզելային վառելիքի եւ սեղմված բնական գազի թանկացմանը զուգահեռ, մի շարք լայն սպառման ապրանքների գծով արձանագրվել է նաեւ գնի նվազում։ Այս մասին, այսօր լրագրողների հետ հանդիպմանը տեղեկացրեց Տնտեսական մրցակցության պաշտպանության պետական Հանձնաժողովի նախագահ Արտակ Շաբոյանը:։
Նրա խոսքով, դա պայմանավորված է որոշ շուկաներում մուտքի խոչընդոտների վերացմամբ, ԵԱՏՄ անդամակցությամբ եւ այլ օբյեկտիվ գործոններով. «Մասնավորապես, 2018 թվականի հունվարին 2017-ի հունվարի համեմատ 14 տոկոսով նվազել են շաքարավազի, 22 տոկոսով հավի թարմ մսի, 5 տոկոսով ձեթի, 6 տոկոսով ալյուրի, 52 տոկոսով հնդկաձավարի, 37 տոկոսով ոսպի եւ մի շարք այլ ապրանքների գները»:
Նա հավելեց, որ Հանձնաժողովը շարունակում է ամենօրյա կտրվածքով դիտանցումներ եւ վերահսկողություն իրականացնել գերիշխող ապրանքային շուկաներում՝ հնարավոր չարաշահումները կանխարգելելու նպատակով, իսկ մրցակցային խնդիրների առկայության դեպքում կկիրառվեն օրենքով սահմանված համապատասխան միջոցներ:
