Քաղաքում ամեն քայլափոխի դրված են վիճակախաղերի ավտոմատներ, երեխան հազիվ թաթերի վրա կանգնում է, որ խաղադրույք կատարի: Այս մասին, այսօր՝ հունվարի 16-ին, ԱԺ-ում, «Շահումով խաղերի, ինտերնետ շահումով խաղերի և խաղատների մասին» ՀՀ օրենքում փոփոխություն և լրացումներ կատարելու մասին օրինագծի քննարկման ժամանակ հայտարարեց «Ծառուկյան» խմբակցության պատգամավոր Նաիրա Զոհրաբյանը:
Նա առաջարկեց, որ միայն խստացնել վերահսկողությունը, այլեւ գովազդների հանել խաղատներն ու վիճակախաղերը:
Օրինագծի հիմնական զեկուցող ՀՀԿ խմբակցության պատգամավոր Սամվել Ֆարմանյանը համաձայնեց այդ առաջարկին՝ ընդգծելով, որ հաջորդ քայլով պետք է կարգավորել գովազդի բովանդակությունն ու ժամերը, նաեւ մատուցման ձեւը. «Դրա մեջ չպետք է լինի գայթակղություն: Պետք է լինի նաեւ վիճակագրություն, թե քանի տոկոսն են պարտվել, քանիսը՝ շահել, որը կարող է մարդկանց հեռու պահել մոլորությունից»:
Հարակից զեկուցող, Ֆինանսների փոխնախարար Կարեն Թամազյանը տեղեկացրեց, որ այսօր Հայաստանում գործում է 5 վիճակախաղի կազմակերպիչ, 3 ինտերնետ շահումով կազմակերպիչ, եւ 4 խաղատուն: «Վիճակախաղի կազմակերպիչները մոտ 200 տոտալիզատորի կետեր ունեն, իսկ մեր տեսչության հաստիքների քանակը 9-ն է: Ամեն տարվա վերջ ներկայացվում է, թե հաջորդ տարի ում ենք ստուգելու»,-ասաց փոխնախարարը:
Ավելի վաղ NEWS.am-ը հայտնել էր, որ հիշյալ օրինագծով առաջարկվում է խստացնել տուգանքի չափը, եթե մինչեւ 21 տարեկան քաղաքացին այցելու է խաղատուն կամ մինչեւ 18 տարեկան քաղաքացին օգտվում է վիճակախաղերի ծառայություններից: Բացի այդ, առաջարկվում է վիճակախաղերի դեպքում եւս տարիքային շեմը 18-ից հասցնել 21-ի:
«Ելք»-ն առաջարկում է խաղատուն այցելելու սահմանափակումներ մտցնել