Հայաստանում ծառայությունների մատուցման ոլորտում աճ է գրանցվել, սակայն ամենալուրջ աճը եղել է բուքմեյքերական ծառայություններինը: Այս մասին հունվարի 16-ին լրագրողների հետ հանդիպման ժամանակ հայտարարեց «Տեղեկացված եւ պաշտպանված սպառող» հասարակական կազմակերպության նախագահ, տնտեսագետ Բաբկեն Պիպոյանը:
Փորձագետի խոսքով՝ հարց է ծագում, թե որքա՞ն է կազմում բուքմեյքերական ընկերությունների բաժինը պետության տնտեսական բաղադրիչում. «Այսինքն, պարզ լեզվով ասած, նրանք բարելավում են քաղաքացիների կյանքը, թե՞ հակառակը: Իրականում, իհարկե՝ հակառակը: Ինչու՞: Մի կողմից բուքմեյքերները, իհարկե, հարկեր են վճարում, սակայն մյուս կողմից այդ հարկերն որեւէ կերպ չեն բարելավում մարդկանց կենսամակարդակը, եւ այն գնալով վատթարանում է քաղաքացիների կորցրած գումարների պատճառով»,- նշեց Պիպոյանը՝ հավելելով, որ ժամանակակից աշխարհի առավել զարգացած երկրներում ամեն կերպ փորձում են սահմանափակել բուքմեյքերական գրասենյակների եւ կազմակերպությունների հնարավորություններն ու իրավունքները, քանի որ բոլորն էլ հասկանում են, որ դրական բաղադրիչներն այստեղ շատ ավելի քիչ են, քան բացասականները:
Միեւնույն ժամանակ, Հայաստանում, ըստ նրա, բուքմեյքերների գործունեության որեւէ սահմանափակում չկա: Ավելին՝ դրանք ամեն կերպ խրախուսվում են, քանի որ միայն գովազդի համար բավականին խոշոր գումարներ են հատկացվում՝ անտեսելով այն փաստը, որ որոշ քաղաքացիների կյանքը զգալիորեն տուժել է դրանց գործունեության պատճառով:
