Ըստ Սահմանադրության՝ Հայաստանը սոցիալական պետություն է, իսկ դա նշանակում է, որ պետությունը եւ գործող իշխանությունները պետք է հոգ տանեն երկրի քաղաքացիների բարեկեցության մասին, ինչը տեղի չի ունենում: Այս մասին հունվարի 16-ին ՀՀ խորհրդարանում հայտարարեց «Ելք» խմբակցության քարտուղար Գեւորգ Գորգիսյանը: Այդպես, ըստ նրա, 2017 թվականի վերջի դրությամբ հիմնական սննդամթերքների գների աճ է գրանցվել, որը որոշ դեպքերում հասել է 40 տոկոսի:
«Նույնիսկ եթե մենք հավատանք, որ այս ամենը պայմանավորված էր համաշխարհային շուկայում գների բարձրացմամբ, ապա մեզ մոտ ամեն դեպքում կլինի 900 տեսակ ապրանքների գների բարձրացում, քանի որ 2018 թվականին ուժի մեջ կմտնեն Եվրասիական տնտեսական միության հետ պայմանավորվածությունները»,- մանրամասնել է Գորգիսյանը:
Նրա խոսքով՝ նման ծանր պայմաններում կգործարկվի նաեւ նոր Հարկային օրենսգիրքը, ինչը կնպաստի արդեն թանկացած ապրանքների գների նոր աճին՝ ավելացված արժեքի հարկի տեսքով, ավելանում է նաեւ դիզելային վառելիքի, գազի եւ բենզինի աքցիզային հարկերը: Այսինքն, միաժամանակ ավելանում են նաեւ քաղաքացիների հարկային պարտավորությունները:
Գորգիսյանը ընգծեց, որ հայ հասարակությունը ի վիճակի է պաշտպանել իր շահերը եւ կոչ արեց մասնակցել «Ելք» դաշինքի՝ գների անսահման աճի դեմ կազմակերպած երթին, որը տեղի կունենա հունվարի 19-ին Երեւանում: