Վայոց ձորի Եղեգնաձոր քաղաքի հյուրանոցներում մեկում հունվարի 3-ին տեղի ունեցած միջադեպի դեպքով հարուցված քրեական գործի շրջանակում կալանավորվել է եւս մեկ անձ:
NEWS.am-ի տեղեկություններով, նրա անունը Հովհաննես է, Եղեգնաձորի բնակիչ: Նրան մեղադրանք է առաջադրվել Քրեական օրենսգրքի 258-րդ հոդվածի 4-րդ մասով:
Առաջին անգամ չէ, որ այս տղամարդը հայտնվում է նման պատմության մեջ: Ամիսներ առաջ Եղեգնաձորի կենտրոնում տեղի ունեցած ծեծկռտուք-դանակահարությանը, ըստ տարածված լուրերի, մասնակցել էր նաեւ նա: Այդ ծեծկռտուքի ժամանակ էլ վերջինիս որդին սպանվեց: Այս գործն այժմ դատարանում է, Հովհաննեսը որեւէ կարգավիճակ չունի:
Հիշեցնենք, որ Ամանորին հյուրանոցում տեղի ունեցած միջադեպի գործով մյուս կալանավորվածները հորեղբոր որդիներ են՝ Ֆրունզե եւ Վահե Բադալյանները: Նրանք գնացել էին Երեւանի քաղաքապետարանի բնապահպանության վարչության պետ Ավետ Մարտիրոսյանի ազգականներին պատկանող հյուրանոց՝ հանդիպելու Եղեգնաձորի բնակիչներից ոմն Դավիթի, սակայն, վիճաբանության մեջ են մտել կին աշխատակցի հետ, ծեծել այցելուներից Հայկ Գալստյանին, որը «Հայանտառի» աշխատակից է: Մեր տեղեկություններով, «Հայանտառ» աշխատակիցը, լսելով հայհոյանքներ, դուրս էր եկել համարից եւ հորդորել հեռանալ հյուրանոցից՝ նշելով, որ այստեղ կանայք եւ երեխաներ կան: Հորդորը, սակայն, Բադալյան եղբայրներն անտեսել են եւ սկսել ծեծել Գալստյանին: Տեղեկություններ կան, որ Բադալյանները խլել են նրա զենքը, վնասել ձեռքն ու դիմել փախուստի: Եղբայրները հասցրել են նաեւ կոտրել հյուրանոցի բակում կայանված ավտոմեքենան, հարվածներ հասցրել հյուրանոցի կին աշխատակցուհուն:
Մեր տեղեկություններով, Բադալյան եղբայրները նախկին պատգամավոր, Մոսկվայաբնակ գործարար Սամվել Սարգսյանի ազգականներն են: Նշենք, որ Բադալյան եղբայրներից մեկը Ռուսաստանում 3 անգամ դատապարտված է եղել, Հայաստան էր վերադարձել վերջերս եւ վարկած կա, որ ցանկանում էր «օրենքով գող» դառնալ: