ԱՄՆ-ն, Ռուսաստանը, Չինաստանը եւ աշխարհի մնացած մասը ԿԺԴՀ-ին որպես միջուկային գերտերություն չեն ճանաչում: Այս մասին հայտարարել է ԱՄՆ պետքարտուղար Ռեքս Թիլերսոնը Վանկուվերում կայացած գագաթաժողովում, որը նախագահում են Կանադան եւ ԱՄՆ-ն եւ որտեղ 16 պետությունների արտաքին գործերի նախարարները կքննարկեն ԿԺԴՀ-ի շուրջ ստեղծված իրավիճակը, հաղորդում է ՏԱՍՍ-ը:
«ԱՄՆ-ն Չինաստանի, Կորեայի Հանրապետության, Ճապոնիայի, Ռուսաստանի եւ այժմ ամբողջ միջազգային հանրության հետ Հյուսիսային Կորեայի ռեժիմին հայտարարում են, որ մենք չենք կարող եւ չենք ընդունի ձեզ որպես միջուկային տերություն», - ասել է նա:
«Մենք Կորեական թերակղզու շուրջ գլոբալ խնդիր ենք տեսնում, որը պահանջում է գլոբալ լուծում: Մենք պետք է երկարաժամկետ խաղաղ լուծումն իրականացնենք, որպեսզի կանխենք ապագա ճգնաժամը», - ասել է նա:
Նրա խոսքով՝ «Փհենյանի շարունակվող սադրանքները չպետք է մնան առանց զգալի եւ հստակ հետեւանքների»:
«Մենք պահանջում ենք ՄԱԿ Անվտանգության խորհրդի պատժամիջոցների լիարժեք իրականացում՝ հաշվի առնելով դրանք որպես օրենքի տառ: Մենք հատկապես դրան կոչ ենք անում Ռուսաստանին եւ Չինաստանին: Ամբողջական իրականացումը նրանց ժողովուրդների անվտանգությունն ապահովելու գլխավոր հարցն է եւ միջազգային պարտավորությունների նկատմամբ հարգալից վերաբերմունքի հստակ ազդանշան», - ասել է Թիլերսոնը:
