«Ոստիկանության մասին» ՀՀ օրենքում փոփոխությունների վերաբերյալ օրենքի նախագիծը նախատեսում է հանցագործությունը կանխելիս կամ բացահայտելիս հասարակական կարգի պահպանությունը, այդ թվում ճանապարհային երթեւեկության անվտանգության ապահովելիս, ոստիկանության ծառայողներին իրավունք վերապահել օգտագործել տեսաձայնագրող կամ լուսանկարահանող տեխնիկական միջոցներ: Այս մասին, այսօր՝ հունվարի 17-ին, ԱԺ-ում օրինագիծը ներկայացնելիս նշեց ՀՀ փոխոստիկանապետ Վարդան Եղիազարյանը (ֆոտոռեպորտաժ):
Առաջարկվող լրացումների արդյունքում, ըստ նրա, օրենքի մակարդակով կամրագրվեն տեխնիկական միջոցների ամրագրման հիմքերը, կարգը, տվյալների պահպանման ժամկետները, կապահովվի տեղեկությունների հավաքման եւ օգտագործման նպատակի լեգիտիմությունը. այսինքն կհաստակեցվեն մասնավոր կյանքի ոլորտ ոստիկանական միջամտության սահմանները:
Փոխոստիկանապետը նշեց, որ օրենքում կսահմանվեն, որ հանրային վայրերում անշարժ տեսանկարահանող եւ լուսանկարահանող տեխնիկական միջոցների, ինչպես նաեւ ոստիկանների կողմից շարժական տեսանկարահանող սարքերի օգտագործման առաձնահատկությունները: Դրանք իրականացվելու են միայն ծառայողական, ոչ անձնական տեխնիկական միջոցներով:
Օրենքը սահմանում է, որ տեխնիկական միջոցով խախտում հայտնաբերելու դեպքում, ոստիկանության ծառայողն իրավունք չի ունենա դադարեցնել տեսանկարահանումը կամ լուսանկարահանումը: Կսահմանվի նաեւ պարտադիր նախազգուշացման պահանջ, շարժականի դեպքում բանավոր, իսկ անշարժ սարքերի դեպքում ցուցանակներ տեղադրելու եւ կայքում հասցեները հրապարակելու միջոցով:
Կսահմանվեն ձայնագրությունները պահպանելու ժամկետները, օգտագործելու նպատակները, կսահմանվի դրանք հրապարակելու կամ այլ նպատակով օգտագործելու արգելքը:
«Հաշվի առնելով տվյալների մշակման համաչափության սկզբունքը, նախագծում տվյալների պահպանման ժամկետ է ընտրվել 7 օրը, որից հետո դրանք պետք է ոչնչացվեն: Միաժամանակ սահմանվում են այն դեպքերը, երբ տեսանյութերի կամ լուսանկարների ոչնչացումը կարող է տարաժամկետվել:
Կսահմանվեն նաեւ տվյալների պահոց մուտք գործելու, տվյալներին ծանոթանալու իրավունք ունեցող ոստիկանության պաշտոնատար անձանց ցանկը: Այդ տվյալները պահպանելու եւ ոչնչացնելու կարգը»,-ընդգծեց Վարդան Եղիազարյանը:
