Այսօր՝ հունվարի 17-ին, Ոստիկանության ծառայողները հայտնաբերել են 2017 թվականի դեկտեմբերի 22-ին Երեւանի Նոր Նորք վարչական շրջանի «Երեւան Սիթի»-ում 61-ամյա Լեւոն Ասատրյանին սպանելու մեջ կասկածվողին։
Shamshyan.com-ի փոխանցմամբ, ոստիկանները կասկածյալին հայտնաբերելու նպատակով մայրաքաղաքում ու մարզերում շրջել են 5 հազարից ավելի տարածքներ, այդ թվում եղել են առեւտրի կենտրոններում, բացօթյա եւ փակ շուկաներում։
Կասկածյալը 55-ամյա Սերգեյ Վ․-ն է, ով հայտնաբերվել է Էրեբունի վարչական տարածքում։ Նա չի զղջացել իր կատարածի համար՝ ասելով, որ դեպքից օրեր առաջ ինքը փորձել է սպանվածի կշեռքից օգտվել, սակայն սպանվածն իրեն պատասխանել է, որ կշեռքը չի աշխատում եւ նա սպանվածին ասել է. «Եթե չի աշխատում, ինչո՞ւ ես օգտագործում», եւ սպանվածը իբրեւ թե հայհոյանքներ է տվել իր հասցեին եւ կշռաքարով հարվածել իրեն, եւ օրեր անց ինքը վրեժ է լուծել նրանից։
Կասկածյալ Սերգեյ Վ․-ն տեղափոխվել է Ոստիկանության Նոր Նորքի բաժին, որտեղից էլ տեղափոխվելու է Հայաստանի քննչական կոմիտեի Երեւան քաղաքի քննչական վարչության Ավան եւ Նոր Նորք վարչական շրջանների քննչական բաժին։
Ավելի վաղ NEWS.am-ը հայտնել էր, որ 2017 թվականի դեկտեմբերի 22-ին, ժամը 12.00-ին, «Սուրբ Գրիգոր Լուսավորիչ» բժշկական կենտրոնից ոստիկանություն հաղորդում էր ստացվել, որ Գայի պողոտայի շուկայից իրենց մոտ էր տեղափոխվել 60-ամյա մի տղամարդու դի` «ձախ վերամրակային շրջանի ծակած-կտրած վերք» ախտորոշումով: Մեկնած օպերատիվ խումբը պարզել էր, որ նույն օրը, ժամը 11.30-ին, նշված շուկայում տեղի ունեցած վիճաբանության ժամանակ անհայտ անձը սուր կտրող-ծակող գործիքով հարվածել էր նրա պարանոցին` պատճառելով մարմնական վնասվածքներ, ինչի հետեւանքով տղամարդը մահացել էր: