Յուրաքանչյուր երկրում գոյությունն ունեն պատշաճ իրավական մեխանիզմներ, իսկ այս դեպքում՝ մեղադրանքի պատասխանատուն դատախազությունն է, քննության պատասխանատուն՝ քննիչը, եւ այդ գործերը կարգավորվում են նաեւ դատական համակարգի կողմից: Այս մասին, այսօր՝ հունվարի 17-ին, ԱԺ-ում լրագրողների հետ զրույցում անդրադառնալով «Ճվճվ Արոյի» որդիներին ժամանակին չձերբակալելուն եւ երկրում անպատժելիության մթնոլորտին:
«Տվյալ դեպքում որեւէ մեկի գործունությանը գնահատական տալ չեմ կարող, որովհետեւ խոսքը կոնկրետ իրավիճակին է վերաբերում, այլ ոչ թե ոչ պրոֆեսիոնալ գնահատականներ տալուն», - նշեց նա:
Դիտարկմանը, թե մասնավորապես, եղբայրներից կրտսերի՝ Սերժ Վարդանյանի նկատմամբ հետախուզում էր հայտարարված, բայց միայն ավագ եղբոր կողմից 2 ոստիկան մահվամբ ավարտված վթարից հետո միայն Սերժ Վարդանյանին կայծակնային արագությամբ հայտնաբերեցին ու ձերբակալեցին, Դավիթ Հարությունյանն արձագանքեց. «Ես չեմ կարող ասել, այդ հարցով դիմեք ոստիկանությանը, միգուցե ձեզ ավելի մանրամասն կներկայացնեն: Ես արդարադատության նախարարն եմ, ոչ թե մի անձ, որ քաղաքական պատասխանատվություն է կրում ոստիկանության կամ դատախազության աշխատանքի համար»:
Դավիթ Հարությունյանը կարծիք հայտնեց, որ անպատժելիություն և հովանավորչություն մեր երկրում, որպես կանոն, չկա. «Նման յուրաքանչյուր դեպք արժանի է ոչ միայն պարսավանքի, այլև պատասխանատվության: Պետք է լինել կույր, դա չտեսնելու համար»:
