ԱՄՆ Կոնգրեսի անդամ Ֆրանք Փալոնեն Կոնգրեսում իր գործընկերներին կոչ է արել արհեստական խոչընդոտները վերացնել եւ բացել ԱՄՆ եւ Արցախի միջեւ կապը:
Կոնգրեսականը ներկայացրել է «ԱՄՆ-Արցախ ճանապարհորդություն եւ կապ» բանաձեւը, հաղորդում է Ամերիկայի Հայ Դատի հանձնախումբը: «Արցախում հաջողված ժողովրդավարական կառավարություն է գործում, եւ ոչինչ չպետք է խոչընդոտի ԱՄՆ եւ այլ երկրների հետ փոխգործակցությանը: Սեպտեմբերին իմ այցը Արցախ նորից ցույց տվեց այն մեծ հաջողությունները, որ Արցախը ձեռք է բերել վերջին տարիներին, եւ ուրիշներին էլ, ինչպես ինձ պետք է տրվի նույն հնարավորությունը: Արագ զարգացող երկրներին, օրինակ` Արցախին ճանաչումը չընդունելու միջոցով խոչընդոտելու փոխարեն, ԱՄՆ-ն պետք է ընդունի եւ խրախուսի նրանց պաշտոնական գործողությունների միջոցով», - ասել է օրենսդիրը:
Բանաձեւն ընդգծում է Արցախի հավատարմությունը խաղաղ նախաձեռնություններին, ինչպիսին կոնգրեսականներ Էդ Ռոյսի եւ Էլիոտ Էնգելի նախաձեռնությունն է, որը կոչ է անում շփման գծից դիպուկահարների եւ ծանր հրետանու հեռացմանը, ԵԱՀԿ դիտորդների քանակի ավելացմանը:
Փաստաթուղթը կոչ է անում ԱՄՆ կառավարության բոլոր մակարդակներում պաշտոնատար անձանց թույլ տալ այցելել Արցախ եւ բաց եւ անմիջական շփվել հանրապետության գործընկերների հետ, խրախուսել Արցախի պաշտոնյաների եւ Միացյալ Նահանգների գործադիր եւ օրենսդիր ճյուղերի ներկայացուցիչների միջեւ անմիջական շփումները:
ԱՀԴՀ-ն շնորհակալություն է հայտնել կոնգրեսականին բանաձեւի ներկայացման համար, որը կոչ է անում այլեւս չխոչընդոտել բաց երկխոսությանը, որն այդքան անհրաժեշտ է Արցախում ամուր եւ ժողովրդավարական խաղաղության համար:
