Շինարարության ոլորտում 2108-ին ակնկալում ենք որոշակի աշխուժություն: Այս մասին, այսօր՝ հունվարի 18-ին, կառավարության նիստում հայտարարեց ՀՀ վարչապետ Կարեն Կարապետյանը:
Նա ոլորտում առկա վիճակի բարելավման վերաբերյալ հանձնարականներ տվեց.
«2017 թվականին վերջում շինարարության ոլորտում արձանագրվեց աճ, եւ առաջիկայում ակնկալում ենք այդ տեմպերի ավելացում»,-ասաց նա՝ հավելելով, որ անցած տարի շինարարական թույլտվությունների տրամադրման ոլորտում խնդիրներ են եղել, որոց վերաբերյալ համապատասխան հանձնարարական էր տրվել նախորդ տարվա նոյեմբերին:
«Միաժամանակ, իրականացված ուսումնասիրությունների եւ կառուցապատողների հանդիպումների հետ արդյունքում առաջացել է շինարարության ոլորտում առկա վարչարարության, իրավական ակտերով նախատեսված ընդհանուր պահանջների պարզեցման եւ հստակեցման անհրաժեշտություն:
Հաշվի առնելով վերոնշյալը, հանձնարարում եմ տարածքային կառավարման եւ զարգացման նախարարին, Քաղաքաշինության պետական կոմիտեի նախագահին, մարզպետներին եւ առաջարկում եմ Երեւանի քաղաքապետին մեկ ամսյա ժամկետում մշակել շինարարության ոլորտի ամբողջ գործընթացի հստակեցման եւ իրավասու մարմինների վարչարարությունների թույլտվությունների տրամադրման կարգերի պարզեցմանն ուղղված առաջարկությունների փաթեթ եւ ներկայացնել կառավարության աշխատակազմ»,-ընդգծեց վարչապետը:
Բացի այդ, նա կառավարության աշխատակազմի ղեկավարին եւ Քաղաքաշինության կոմիտեի ղեկավարին հանձնարարեց տասնօրյա ժամկետում կառուցապատողների, ներդրողների մասնակցությամբ կազմակերպել խորհրդակցություն։
«Այստեղ՝ շինարարության ոլորտում 2018թ. ակնկալում ենք որոշակի աշխուժություն, պետք է մաքսիմալ լսել, թե ինչն է իրենց խանգարում եւ շատ պարզ, հստակ մեխանիզմ դնել, որը տարբեր մեկնաբանությունների քիչ տեղիք տա»,-ասաց նա:
