«Ելքը» ծրագիր ունի եւ կոնկրետ նպատակով է հունվարի 19-ին քաղաքացիներին հրավիրում հավաքի: Այս մասին այսօր՝ հունվարի 18-ին, լրագրողների հետ հանդիպմանն ասաց ԱԺ «Ելք» խմբակցության պատգամավոր Լենա Նազարյանը:
«Սա մեր նախընտրական հավաքը չէ, մենք կոչ չենք անում մարդկանց մեզ աջակցել, սատարել, թանկացումների հարցը բոլորին է վերաբերում, ամեն մեկը երթին գալով՝ իր համար է գործելու: Մենք որպես քաղաքական ուժ, պահին հնարավորություն ենք ստեղծում մարդկանց համար, որպեսզի բողոքեն թանկացումների դեմ, դա ազդելու է յուրաքանչյուրի կյանքի վրա: Մենք որպես ընդդիմություն, ձեւավորում ենք պահանջը թանկացումների դեմ բողոքի, իշխանափոխության դեմ, բայց պատվիրատուն քաղաքացին է մնում, քաղաքացին պետք է մեզ թելադրի, թե մենք հաջորդ քայլն անում ենք, թե չէ: Հիմա վաղը կերեւա՝ հաջորդ քայլը մենք կանենք, թե ոչ, այսինքն՝ հաջորդ երթը կկազմակերպենք, թե ոչ: Ես կարծում եմ, որ այնքան մարդ կգա, որ մեզ ուղերձ կլինի հաջորդ երթը կազմակերպելու»,-ասաց նա:
ԱԺ «Ելք» խմբակցության պատգամավոր Գեւորգ Գորգիսյանն էլ նշեց, որ սոցիալական բոլոր խնդիրները լուծվում են հասարակական ճնշման արդյունքում, այդպիսի օրինակներ ունեցել ենք. «Երբ կա հասարակական պահանջ, բողոք, անհետեւանք չի մնում»:
Նշենք, որ «Ելքը» հունվարի 19-ին, ժամը 17:00-ին հրավիրել է երթ՝ ընդդեմ թանկացումների: