Ներկայումս ճանապարհաշինության ոլորտում ոլորտում գնումների գործընթացն իրականացնում է առանց նախաորակավորման փուլի, ինչի արդյունքում նախագծային, տեխնիկական հսկողության եւ շինարարության աշխատանքները որոշակի խնդիրներ են առաջացնում: Այս մասին, այսօր՝ հունվարի 18-ին, կառավարության նիստում հայտարարել է ՀՀ վարչապետ Կարեն Կարապետյանը:
Նրա խոսքով, նման խնդիրների ռիսկը նվազագույնի հասցնելու նպատակով գնումների գործընթացում միջազգային փորձում լայնորեն կիրառվում է նախաորակավորման ինստիտուտը:
Կարեն Կարապետյանը Տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանին, Ֆինանսների նախարար Վարդան Արամյանին, Քաղաքաշինության պետական կոմիտեի նախագահ Նարեկ Սարգսյանին հանձնարարեց մեկամսյա ժամկետում մշակել եւ կառավարության աշխատակազմ ներկայացնել ճանապարհաշինության ու ճանապարհների հիմնանորոգման ոլորոտում, նաեւ, ըստ անհրաժեշտության, պետական գնումների այլ ոլորտներում համապատասխան գործընթացում նախաորակավորման ինստիտուտի ներդրման առաջարկություններ:
«Այս մոտեցմանը հիմնականում դեմ է Ֆիննախը՝ ասելով, որ հնարավոր է, էժան լուծումները բաց թողենք, բայց մենք առանց նախաորակավորման ունենք փաստեր, երբ որ հաղթում է տենդերը անհասկանալի կառույց, որը համապատասխան հմտություն չունի: Պետք է այս երկու մոտեցումների մեջ լավագույն կետը գտնենք, մյուս կողմից` հասկանանք, թե ում հետ ենք գործ բռնում ու ինչքանով ենք այդ մարդու աշխատանքներից ակնկալում լուծումներ», - ընդգծեց վարչապետը՝ հավելելով, որ այսուհետ համեմատելու են նախորդ տարիների գնումների ոլորտում կատարված աշխատանքը. «Ես պարտադիր ուզում եմ լսել մեկ միավոր գնի փոփոխությունն ինչպես է կատարվել: Մենք այստեղ օպտիմիզացիայի շատ մեծ տեղ ունենք»:
