Սպանություն կազմակերպելու կասկածանքով այսօր առավոտյան ձերբակալվել է Վահագն Աբգարյանը (Ալավերդցի Վահագն): Այս մասին այսօր՝ հունվարի 18-ին, NEWS.am-ին հայտնեց Քննչական կոմիտեի նախագահի խորհրդական Սոնա Տռուզյանը:
Վահագն Աբգարյանը ձերբակալվել է 2017թ. հունիսին Ալավերդի քաղաքում տեղի ունեցած սպանությունը կազմակերպելու կասկածանքով, քրեական գործի շրջանակում կա մեկ կալանավոր, որը մեղադրվում է սպանությունը կատարելու մեջ:
Հիշեցնենք, որ 2017 թվականի հունիսի 13-ին՝ ժամը 12։10-ի սահմաններում, Ալավերդի քաղաքի Թումանյան 20 հասցեում գործող ծաղկի վաճառքի սրահի դիմաց նույն քաղաքի բնակիչ, 1991թ. ծնված Վլադիմիր Դավթյանը համաքաղաքացի, 1978թ. ծնված Կամո Փիրուզյանին սպանելու դիտավորությամբ, իր մոտ ապօրինի պահվող «Մակարով» տեսակի ատրճանակից 8 անգամ կրակել էր վերջինի մարմնի տարբեր մասերին, որի հետեւանքով Կամո Փիրուզյանը ստացած հրազենային վնասվածքներից տեղում մահացել է:
Վլադիմիր Դավթյանը նույն պահին բռնվել է նշված վայրում ծառայություն իրականացնող ոստիկանության Թումանյանի բաժնի աշխատակիցների կողմից, նա կալանավորված է:
