Քաշաթաղի շրջանի Աղավնո համայնքում այս տարի ավարտին կհասնի 50 նոր բնակելի տների կառուցումը։ «Արցախպրես»-ի հաղորդմամբ՝ այս մասին, հունվարի 17-ին, լրագրողների հետ հանդիպմանը ասել է Արցախի պետական նախարար Արայիկ Հարությունյանը՝ պատասխանելով վերաբնակեցման եւ վերաբնակեցված բնակավայրերի զարգացման մասին լրագրողների հարցերին:
Նա ընդգծել է նաեւ, որ շարունակվում են աշխատանքները Քաշաթաղի շրջանի Իշխանաձոր գյուղի զարգացման ուղղությամբ՝ որպես տեղական նշանակության կենտրոն եւ աշխատաշուկա։
«Սահմանադրական փոփոխություններից հետո՝ աշխատանքի, սոցիալական հարցերի եւ վերաբնակեցման նախարարությունն այս տարվա ընթացքում տնօրինելու է ավելի մեծ բյուջետային միջոցներ, որոնք, նախագահի հանձնարարությամբ, ուղղվելու են նաեւ վերաբնակեցված համայնքների զարգացմանը,- նշել է պետական նախարարը։- Իշխանաձորից զատ՝ շինարարական աշխատանքներ ենք իրականացնելու նաեւ Քաշաթաղի շրջանի Կովսական եւ Միջնավան քաղաքներում, զարգացման ծրագրեր ունենք Հադրութի շրջանի Արաքսավան եւ Առաջամուղ արաքսամերձ գյուղերում։ Առաջիկայում նախատեսվում է Շահումյանի շրջանի Քարվաճառ քաղաքի բնակարանային ֆոնդի մեծացում, ինչպես նաեւ՝ շրջանում նոր տնտեսական նախագծերի իրականացում մասնավոր ներդրումներով»։