Հայաստանի քրեակատարողական համակարգում պահպանվում է բանտերի գերծանրաբեռնվածության խնդիրը: Այս մասին հունվարի 19-ին մամուլի ասուլիսի ժամանակ ասաց ՔԿՀ-ներում հասարակական դիտորդական խմբի անդամ Ռոբերտ Ռեւազյանը:
Նրա գնահատմամբ՝ անցյալ տարի պահման պայմանների մեծ տարբերություններ չեն գրանցվել նախորդ տարիների համեմատությամբ: Գերծանրաբեռնվածության առումով ամենամեծ խնդիրն առկա է «Նուբարաշեն» ՔԿՀ-ում: Դեպքեր են եղել, երբ 8 մարդու համար նախատեսված խցում 15 մարդ է պահվել: Այս ՔԿՀ-ի առաջին հարկը ընդհանրապես ապրելու համար հարմար չէ, այդ պատճառով դատապարտյալների համար նախատեսված առաջին հարկի խցերը փակեցին: Սակայն դեռեւս այստեղ են գտնվում պատժախցերը, կարանտինային խցերը եւ հացադուլ հայտարարածների համար նախատեսված խցերը: «Հարկը կիսանկուղային է, ավելի շուտ՝ նույնիսկ նկուղային: Այստեղ խոնավ է, պատերին բորբոս կա, խավարասերներ եւ այլ միջատներ: Այսպիսի խցերում պահելը պետք է գնահատել որպես անմարդկային վերաբերմունքի դրսեւորում»,- ընդգծեց Ռեւազյանը: Նրա խոսքով՝ մյուս ՔԿՀ-ներն ավելի լավ վիճակում են, բայց դրանցում էլ, չնայած առաջին հայացքից գերծանրաբեռնվածության խնդիրների բացակայությանը, այնուամենայնիվ, կա: «Բանն այն է, որ չնայած դատապարտյալների թիվը առավելագույնից քիչ է, որոշ խցերում նախատեսված թվից ավելի շատ դատապարտյալ է պահվում»,- պարզաբանեց Ռեւազյանը:
Դրան հավելած մեծ տարբերություն կա խցերի միջեւ: Կան ամբողջությամբ վերանորոգված խցեր, բայց կան նաեւ շատ վատ վիճակում գտնվողներ: Մի շարք դեպքերում դա պատճառաբանվում է նրանով, որ կալանավորները կարող են իրենց միջոցներով վերանորոգել: Էլիտար խցերի հայտնվելը կոռուպցիոն ռիսկեր է պաունակում, հիշեցրեց փորձագետը՝ շեշտելով, որ պետությունը պետք է իր վրա վերցնի պատասխանատվությունը եւ խցերը հավասար վիճակի բերի:
ԱՆ ՔԿՎ իրավաբանական վարչության պետի տեղակալ, փոխգնդապետ Տիգրան Սահակյանն իր հերթին համաձայեց պահման պայմանների հետ կապված խնդիրների առկայության հետ՝ հիշեցնելով որ դրանք կապված են ԽՍՀՄ տարիներից ժառանգած շենքերի հետ: Նրա խոսքով՝ շենքերը վերանորոգելու փորձեր են կատարել, սակայն դա անբավարար էր: Այս պատճառով 2009 թվականին ընդունվեց ենթակառուցվածքների բարեփոխում անցկացնելու որոշում, որի արդյունքում ստեղծվեց «Արմավիր» ՔԿՀ-ն: Ամբողջ ծրագրի իրականացման շնորհիվ Հայաստանում կստեղծվեն միջազգային ստանդարտներին համապատասխանող դատապարտյալների պահման պայմաններ: Ծրագիրը փուլ առ փուլ է իրականացվում, քանի որ մեծ ծախսեր է պահանջում: Հաջորդ փուլում նախատեսվել է Գորիսում նոր ՔԿՀ-ի բացումը: Բոլորս հասկանում ենք, որ ֆինանսներն են պատճառը:
