Հինգշաբթի հանրապետական 20 կոնգրեսականներ ԱՄՆ Կոնգրեսի Ներկայացուցիչների պալատի քննարկմանն են ներկայացրել Իրանի դեմ կրկնակի պատժամիջոցների սահմանման պայմանների մասին օրինագիծը, որոնք նախկինում հանվել էին Իրանի միջուկային համաձայնագրի՝ Գործողությունների համատեղ համապարփակ ծրագրի իրականացման շրջանակում: Այս մասին նշված է նախաձեռնության հեղինակ Իլինոյսից ընտրված ստորին պալատի անդամ Պիտեր Ռոսքամի կայքում, փոխանցում է ՏԱՍՍ-ը:
Տեքստի համաձայն՝ միջոցառումները, որոնց գործողությունը կասեցվել էր 2016-ի հունվարին, կրկին ուժի մեջ կմտնեն, եթե Իրանը շարունակի բալիստիկ հրթիռների մշակումն ու փորձարկումները, որոնք կարող են միջուկային մարտագլխիկ կրել, կամ ռազմական ուրանի կամ պլուտոնիումի արտադրության ենթակառուցվածք ստեղծի:
Օրինագիծը ԱՄՆ նախագահին պարտավորեցնում է յուրաքանչյուր 90 օրը մեկ Կոնգրեսին իրազեկել, որ Թեհրանը միջուկային զենք եւ հրթիռներ չի ստեղծում, ինչպես նաեւ տեսուչներին թույլ է տալիս իր օբյեկտներ մուտք գործել: Եթե երկրի ղեկավարը դա չանի, համաձայնագրի շրջանակում կասեցված պատժամիջոցային ռեժիմը կրկին կգործարկվի: