Ծառուկյան խմբակցության պատգամավոր Գեւորգ Պետորսյանը ՀՀԿ-ի նախագահի թեկնածու, Մեծ Բրիտանիայում Հայաստանի դեսպան Արմեն Սարգսյանին ճանաչում է զուտ ինտերնետային մակարդակով: Այս մասին NEWS.am-ի հետ զրույցում ասել է պատգամավորը:
Հիշեցնենք, որ Գագիկ Ծառուկյանը անցած շաբաթ լրագրողների հետ զրույցում չէր բացառել, որ «Ծառուկյան» խմբակցությունը կքվեարկի նախագահի թեկնածուի օգտին:
Կոնկրետ Արմեն Սարգսյանի թեկնածության մասին Գեւորգ Պետրոսյանն ասաց. «Արմեն Սարգսյանին ես ճանաչում եմ զուտ ինտերնետային մակարդակով, իր անձի ու հատկանիշների վերաբերյալ որեւէ կարծիք արտահայտել չեմ կարող, իսկ թե Ծառուկյան դաշինքը կսատարի, թե ոչ, որեւէ քննարկում չի եղել: Այս պահին չեմ կարող ասել»:
Նշենք, որ այսօր՝ հունվարի 19-ին, ավելի վաղ Սերժ Սարգսյանը ՀՀ նախագահի նստավայրում ընդունել է Մեծ Բրիտանիայում Հայաստանի արտակարգ եւ լիազոր դեսպան Արմեն Սարգսյանին եւ առաջարկել է նրան դառնալ ՀՀ 4-րդ նախագահի թեկնածու՝ ՀՀԿ-ի կողմից։
