ՀՀ նախագահ Սերժ Սարգսյանն այսօր՝ հուվարի 19-ին, Հայաստանի Հանրապետության պետական պարգեւներով պարգեւատրեց Հայաստանի մշակույթի, ճարտարապետության, գիտության եւ կրթության ոլորտի մի շարք ներկայացուցիչների։
ՀՀ պետական պարգեւի արժանացավ ժամանակակից արձակագիր Գուրգեն Խանջյանը՝ «Տուր ձեռքդ, պստլո» վեպի համար։ Պետական պարգեւների արժանացան նաեւ կոմպոզիտոր Էդվարդ Հայրապետյանը, ֆիզիկոս Համլետ Ավետիսյանը, «Կյանք ու կռիվ» ֆիլմի ռեժիսոր Մհեր Մկրտչյանը, բեմադրող օպերատոր Վահագն Հակոբյանը, դերասան Սամվել Թադեւոսյանը, պրոդյուսերներ Ռուբեն Ջաղինյանն ու Կարեն Նազարյանը։
Պետական պարգեւներ ստացան նաեւ Վանաձոր բժշկակական կենտրոնի շենքի ճարտարապետներ՝ Լեւոն Ազնավուրյանը, Ռուզաննա Մամյանը, Սարգիս Սարդարյանը եւ շինարար Սուրեն Հակոբյանը։
Հանդիսավոր արարողության ընթացքում հանձնախմբերի նախագահները ներկայացրին մրցանակների հայցման ներկայացված աշխատանքները, քննարկման արդյունքում հանձնախմբերի կողմից կայացված որոշումները՝ մրցանակների արժանացած աշխատանքներն ու դրանց հեղինակներին, ինչպես նաեւ իրենց առաջարկությունները հնչեցրել մրցանակակիրների ընտրության գործընթացն առավել արդյունավետ դարձնելու ուղղությամբ:
2017 թվականի պետական մրցանակներ չշնորհվեցին կերպարվեստի, թատերական արվեստի ոլորտներում, ինչպես նաեւ հումանիտար եւ հասարակական գիտությունների բնագավառում, որոնց հանձնախմբերի նախագահների տեղեկացմամբ, հիշյալ ոլորտներում 2017թ. պետական մրցանակի ներկայացված աշխատանքները հանձնաժողովի անդամների փակ գաղտնի քվեարկության արդյունքում չեն հավաքել բավարար քանակի ձայներ: