Մեսրոպ Մաշտոցի անվան հին ձեռագրերի «Մատենադարան» գիտահետազոտական ինստիտուտում այսօր՝ հունվարի 19-ին, կայացել է հոգաբարձուների նորաստեղծ խորհրդի անդրանիկ նիստը, որտեղ միաձայն քվեարկությամբ հոգաբարձուների խորհրդի նախագահ է ընտրվել «Փյունիկ» մարդկային ռեսուրսների զարգացման համահայկական հիմնադրամի խորհրդի նախագահ, պատմական գիտությունների դոկտոր, պրոֆեսոր, ԵՊՀ Աստվածաբանության ֆակուլտետի Հայ եկեղեցու պատմության եւ եկեղեցաբանության ամբիոնի վարիչ Լեւոն Սարգսյանը: Նա ՀՀ նախագահ Սերժ Սարգսյանի եղբայրն է:
Բացի այդ, միաձայն քվեարկությամբ Մատենադարանի հոգաբարձուների խորհրդի քարտուղար է ընտրվել Մատենադարանի Արխիվային բաժնի վարիչ, պատմական գիտությունների թեկնածու Արմեն Մալխասյանը:
Մատենադարանից NEWS.am-ին հայտնում են, որ Հոգաբարձուների խորհուրդը քննարկել եւ հաստատել է «Մատենադարան» Մեսրոպ Մաշտոցի անվան հին ձեռագրերի գիտահետազոտական ինստիտուտ» հիմնադրամի տնօրենի ընտրության կանոնակարգը:
Մատենադարանի տնօրենի պաշտոնի համար մրցույթի օր է նշանակվել մարտի 6-ը:
Ըստ մամուլի տեղեկություններին, Մատենադարանի տնօրենի պաշտոնի հավանական թեկնածուն տնօրենի պաշտոնակատար Վահան Տեր-Ղեւոնդյանն է: Նա եղել է Մատենադարանի գիտական քարտուղարն ու «Հայաստան» համահայկական հիմնադրամի գործադիր տնօրենը:
