Հայաստանում ԵՄ-ի նախաձեռնությամբ քաղաքացիական հասարակության ինստիտուտներին աջակցելու նպատակով 5 նոր դրամաշնորհային ծրագիր կիրականացվի: Այս մասին հունվարի 19-ին Եվրամիության եւ քաղաքացիական հասարակության միջեւ կնքված պայմանագրերի ներկայացման ժամանակ հայտարարել է Հայաստանում ԵՄ պատվիրակության ղեկավար, դեսպան Պյոտր Սվիտալսկին: Նրա խոսքով՝ ծրագրերի իրականացման համար ընդհանուր առմամբ ավելի քան 1,5 մլն եվրո է հատկացվել:
«Ինչպես մենք բազմիցս հայտարարել ենք, մենք շարունակում ենք աջակցել Հայաստանում քաղաքացիական հասարակության ինստիտուտներին, եւ այժմ ԵՄ-ն հայտարարում է հենց այդ նպատակին ծառայող ծրագրեր մասին»,- նշել է ԵՄ պատվիրակության ղեկավարը` ընդգծելով, որ դրամաշնորհային ծրագրերը կիրականացվեն համատեղ հիմունքներով, եւ ֆինանսավորման մի մասը իր վրա կվերցնի Հայաստանի կառավարությունը:
Սվիտալսկին հայտնել է, որ ԵՄ-ն ընդհանուր առմամբ 1 մլն 742 հազար 388 եվրո է հատկացնելու` հավելելով, որ այդ ծրագրերի իրականացումը 2017 թվականի նոյեմբերին ստորագրված համապարփակ համագործակցության համաձայնագրի շրջանակներում Հայաստանի եւ Եվրամիության համագործակցության միայն մի մասն է:
Դեսպանի խոսքով՝ մեծ նշանակություն ունի փակ հաստատությունների հետ համագործակցության դրամաշնորհային ծրագիրը, քանի որ ապահովում է թափանցիկությունը` այդ հաստատությունները համապատասխանեցնելով եվրոպական չափանիշներին: «Ծրագրերը միայն մի մասն են կազմում այն ամենի, ինչ մենք մտադիր ենք իրականացնել Հայաստանի հետ համատեղ ստորագրված համաձայնագրի շրջանակներում», - վստահեցրել է եվրոպացի պաշտոնյան:
