Ռուսական ռազմական ուժերը հեռանում են Աֆրինից, որտեղ թուրքական իշխանությունները պատրաստվում են ռազմական գործողություններ իրականացնել սիրիական քրդերի դեմ: Այս մասին հաղորդում է Anadolu գործակալությունը: Ռուսական կոնտինգենտը, որը գտնվում է Քեֆեր Ջեննե գյուղի մոտակայքում, դուրս է բերվում ոչ մեծ խմբերով:
Գործակալության տվյալներով, ռուսական զորքերը գնում են դեպի Սիրիայի նախագահ Բաշար Ասադի վերահսկողության տակ գտնվող տարածքները՝ Նուբուլ եւ Զահրա բնակավայրերը: Ընդ որում, ռուսական զորքերի մի մասը շարունակում է մնալ Աֆրին շրջանում: Ռուսաստանի պաշտպանության նախարարությունը դեռ չի մեկնաբանել այս տեղեկությունները:
Ավելի վաղ Թուրքիայի պաշտպանության նախարարությունը հաղորդել էր, որ բանակցություններ է վարում Ռուսաստանի հետ Աֆրինում զինված օպերացիայի վերաբերյալ: Ուրբաթ օրը թուրքական զինված ուժերը 10 անգամ գնդակոծել են քրդական ինքնապաշտպանական ուժերի (YPG) դիրքերը: Անկարան հատուկ նշանակության զորքերը տեղափոխել է Սիրիայի հետ սահման եւ պատրաստվում է լայնամասշտաբ հարձակման: