ԱՄՆ ՀԴԲ-ն հիմա ստուգումներ է իրականացնում այն մարդու նկատմամբ, որը կարող է ինչ-որ առնչություն ունենալ 2017-ի հոկտեմբերին Լաս Վեգասում ամերիկացի Սթիվեն Փեդոկի կազմակերպած հրաձգության հետ, հայտնում է քաղաքի շերիֆ Ջոզեֆ Լոմբարդոն, փոխանցում է ՏԱՍՍ-ը։
Նրա խոսքով՝ ՀԴԲ-ն նախաձեռնել է հետաքննություն այն «անձի նկատմամբ, որը դաշնային մակարդակով հետաքրքրություն է ներկայացնում»։ Լոմբարդոն նշել է, որ իշխանություններն այդ անձով հետաքրքրվել են՝ ուսումնասիրելով Փեդոքի կազմակերպած սպանդի հանգամանքները։ Շերիֆը այլ մանրամասներ չի հայտնել, չի նշել նաեւ տվյալ անձի անունը։
Լոմբարդոն նշել է, որ հետաքննության ընթացքում ոստիկանությունը նոր մանրամասներ է պարզում տեղի ունեցածի մասին, սակայն Փեդոքի արարքի դրդապատճառները դեռ պարզված չեն։ Շերիֆը հավաստիացնում է, որ Փեդոքը գրոհն իրականացնելու համար նաեւ այլ վայրեր է դիտարկել՝ այդ թվում Սանտա Մոնիկայի հանրահայտ լողափը։ Սակայն հրաձգի կապերը որեւէ ահաբեկչական խմբավորման հետ չի հաջողվել պարզել։
Ըստ Լոմբարդոյի, իրավապահ մարմինները պարզել են, որ Փեդոքը համացանցում ուսումնասիրել է խոշոր միջադեպերի ժամանակ ամերիկյան ոստիկանության գործողությունների մարտավարությունը։ Շերիֆը հայտնել է, որ ամենայն հավանականությամբ Փեդոքի ընկերուհու՝ Մերիլ Դենլիի նկատմամբ մեղադրանք չի առաջադրվի։ Լոմբարդոն նաեւ պատմել է, որ հրաձգին պատկանող համակարգիչներում հայտնաբերվել է մանկական պոռնոգրաֆիայի հետ կապված նյութեր։
Ըստ նոր գնահատականների ՝ Փեդոքի հրաձգության հետեւանքներով տուժածների թիվը հասնում է 851-ի։ Մինչ այդ հայտնում էին 550 տուժածների մասին։
Լոմբարդոյի խոսքով՝ 422 մարդ անմիջական փամփուշտային վիրավորում է ստացել այն բանից հետո, երբ Փեդոքը հյուրանոցի պատուհանից կրակ է բացել երաժշտական փառատոնի այցելուների վրա։ Հրաձգության հետեւանքով զոհվել է 58 մարդ։
Լաս Վեգասի խաղատան մոտ տեղի ունեցած հրաձգությունից զոհվել է առնվազն 20 մարդ (Ֆոտո)
