Տարեսկզբին արձանագրված ճանապարհատրանսպորտային պատահարների աճը պայմանավորված է տաք եղանակով, չոր ճանապարհներով: NEWS.am-ի հետ զրույցում այս մասին հայտարարել է Ճանապարհային ոստիկանության ճանապարհապարեկային ծառայության բաժնի պետ, ոստիկանության գնդապետ Նորիկ Սարգսյանը:
Նրա ներկայացրած տվյալներով՝ անցած տարվա այս ժամանակահատվածի համեմատությամբ այս տարի ավելի մեծ թվով ճանապարհատրանսպորտային պատահարներ են արձանագրվել: Հունվարի 1-ից մինչ օրս արձանագրվել է 165 դեպք, որի հետեւանքով 25 մարդ զոհվել է, 241-ը՝ վիրավորվել:
«Թեեւ զոհերի քանակը նախորդ տարվա համեմատությամբ շատացել է, բայց միանգամից ասել, որ աճ է գրանցվել, չեմ կարող ասել, քանի որ էս պարագայում մենք վերլուծում ենք վթար ծնող պատճառները եւ ակտիվացնում ծառայությունը: Չի բացառվում, որ 10 օր հետո այլ պատկեր ունենանք: Ժամանակ առ ժամանակ կարող է աճ գրանցվել եւ նվազել: Միայն տարվա կտրվածքով կարող ենք վերջնական ասել աճի միտում կա, թե նվազման»,-ասել է Նորիկ Սարգսյանը՝ հավելելով, որ իրենց համար անսպասելի չէր տարեսկզբին արձանագրված ավտովթարների աճը:
«Նախ որ հունվարի 1-ին երթեւեկության ինտեսնիվության աճ էր նկատվել, եւ երկրորդը, որ ամբողջ հանրապետությունում ձյուն չկա, չոր ասվալտապատ ճանապարհներ էին, սպասում էինք, որ վարորդների մոտ արագության գերազանցման փաստերը կավելանան ու դա կբերի ճանապարհային պատահարների աճին: Ամենամեծ նպաստող հանգամանքը դա է եղել: Մարդկանց մոտ կարծիք կա, որ եթե ձյուն եղավ, ճանապարհատրանսպորտային պատահարները կշատանան, բայց հակառակն է, որպես կանոն եթե ճանապարհային ծածկույթը չոր է լինում, այդ ժամանակ ավելի շատ է գրանցվում»,-մանրամասնեց մեր զրուցակիցը:
Ճանապարհային ոստիկանությունը հաշվի առնելով վերոնշյալ պատճառները՝ ուժեղացրել է ծառայությունը: Հարցին՝ եթե եղանակային պայմաններն են պատճառը, ոստիկանությունը հատկապես ո՞ր մասով է ուժեղացված ծառայություն իրականացնում, պատասխանեց. «Հայտնաբերում ենք ոչ սթափ վիճակում վարող վարորդներին: Մի քանի անգամ ավելի շատ ոչ սթափ վիճակոմ մեքենա վարելու փաստեր ենք հայտնաբերել անցած տարվա համեմատությամբ: 2017 թվականից հունվարի 1-9 ընկած ժամանակահատվածում 9 դեպք ենք հայտնաբերել, այս տարի՝ 92, այսինքն՝ տասը անգամ ավելի շատ են ոչ սթափ վիճակում վարելու դեպքերը»:
Անզգուշության հետեւանքով վթարները եւս քիչ չեն, սակայն Նորիկ Սարգսյանի կարծիքով ճանապարհային ոստիկանությունը որեւէ մեղք չունի ոչ այս, ոչ արագությունը գերազանցելու, ոչ էլ անսթափ վիճակում վարելու հարցերում: Որպես ծնող պատճառ շեշտեց նաեւ մեքենաների ավելացման հանգամանքը: Ըստ նրա՝2017 թվականին Հայաստան է ներմուծվել 32 հազար մեքենա, որն էլ իր հերթին նպաստում է ավտովթարների աճին:
