Իրանը պատրաստ է կարգավորել Իրաքի կենտրոնական կառավարության եւ Իրաքի Քրդստանի ինքնավար շրջանի միջեւ երկխոսության խոչընդոտները: Այս մասին հաղորդում է իրանական Tasnim գործակալությունը` վկայակոչելով Իրանի ազգային անվտանգության գերագույն խորհրդի քարտուղար Ալի Շամխանիի հայտարարությունը, փոխանցում է« ՌԻԱ Նովոստին»:
Իրաքի կենտրոնական իշխանությունների և ինքնավար Քրդստանի հարաբերությունները բարդացել են անցյալ տարվա սեպտեմբերին՝ քրդերի կողմից անցկացված անկախության հանրաքվեից հետո, որի համար Բաղդադն իր համաձայնությունը չէր տվել: Շաբաթ օրը ինքնավարության ղեկավար Նեչիրվան Բարզանին բանակցություններ վարելու նպատակով ժամանել է Իրան:
«Իրանի Իսլամական Հանրապետությունը, հաշվի առնելով Էրբիլի նոր քաղաքականությունն ու նրա կենտրոնացվածությունը Բաղդադի հետ երկխոսության եւ համագործակցության վրա, կգործադրի բոլոր ջանքերը՝ Իրաքի կառավարության եւ Քրդստանի շրջանի միջեւ առկա խոչընդոտները հաղթահարելու համար»,- Բարզանիի հետ հանդիպման ժամանակ ասել է Շամխանին: Նա նաեւ ընդգծել է իրանական եւ իրաքյան ժողովուրդների միջև առկա պատմական կապերը, մասնավորապես` քրդական շրջաններում: Նա նշել է, որ, չնայած «երկու ժողովուրդների թշնամիների կողմից թշնամանքի հրահրմանը», երկու երկրների միջեւ համագործակցությունն ու ռազմավարական հարաբերությունները զարգանում են:
