«Ելք» դաշինքին պակասում է ստեղծագործական մտածողությունը: Կանաչ ГАЗ 21-01-ը բողոքի երթի ժամանակ այդքան էլ ստեղծագործական որոշում չէ ընդդիմության համար: Հունվարի 22-ին Ազգային ժողովում ավանդական ճեպազրույցների ընթացքում այս մասին ասաց ՀՅԴ խմբակցության քարտուղար Աղվան Վարդանյանը:
Նրա խոսքով՝ Հայաստանում, այնուամենայնիվ, աղետալի գնաճ չկա: Խոսելով «Ելք» դաշինքի՝ հարկերի նվազեցման պահանջի մասին, նա նշեց, որ այդ դեպքում հարց կառաջանա, թե ինչպես է պետությունը մարելու իր արտաքին պարտքը, եւ այս հարցի պատասխանը պետք է տա հենց ընդդիմությունը, եթե նման պահանջներ է ներկացանում:
Բացի այդ, ՀՅԴ խմբակցության քարտուղարը կարծում է, որ նախորդ տարվա ընթացքում կառավարության գործունեությունը շատ արդյունավետ եւ դրական էր: «Վերջին տասնամյակների ընթացքում Հայաստանը տնտեսական ցուցանիշների առումով նման բարձր ձեռքբերումներ եւ արդյունքներ չի արձանագրել»,- եզրափակեց Աղվան Վարդանյանը: