Ավագ քննիչ Միքայել Զադոյանի եւ փաստաբան Գայանե Գալոյանի մասնակցությամբ 3 հազար ԱՄՆ դոլար կաշառք պահանջելու եւ ստանալու գործով նիստին այսօր` հունվարի 22-ին, հանրային պաշտպաններ ներգրավվեցին: Հանրային պաշտպան Անժելա Հոբոսյանը ներգրավվեց ամբաստանյալ Գայանե Գալոյանի շահերի պաշտպան, իսկ Սիրանուշ Հարությունյանը՝ ամբաստանյալ Բաբկեն Գասպարյանի: Ամբաստանյալ Միքայել Զաքարյանի շահերի պաշտպաններ ներգրավվեցին Սիմոն Ամիրխանյանն ու Հրանտ Անանյանը:
Անժելա Հոբոսյանը հայտարարեց, որ գործի նյութերին ծանոթ չէ եւ ժամանակ է անհրաժեշտ դրանց ծանոթանալու համար. նա Երեւանի Էրեբունի եւ Նուբարաշեն վարչական շրջանների ընդհանուր իրավասության դատարանից մեկ շաբաթ ժամանակ խնդրեց:
Հաջորդ դատական նիստը նշանակվեց փետրվարի 2-ին:
Հիշեցնենք, որ առաջին դատական նիստին Գայանե Գալոյանը խնդրեց իրեն հանրային պաշտպան տրամադրել՝ հրաժարվելով իր պաշտպաններից:
Ըստ մեղադրանքի՝ Բաբկեն Գասպարյանը որդու օգտին իրենց լիազորությունների շրջանակում գործողություններ կատարելու դիմաց, Էրեբունի եւ Նուբարաշեն վարչական շրջանների քննչական բաժնի ավագ քննիչ Միքայել Զադոյանին եւ բաժնի պետի տեղակալ Բունիաթ Եղիազարյանին փաստաբան Գայանե Գալոյանի օժանդակությամբ եւ միջոցով տվել է առանձնապես խոշոր չափերով կաշառք: Գայանե Գալոյանը մեղադրվում է կաշառք ստանալուն օժանդակելու մեջ, իսկ Միքայել Զադոյանն էլ Գայանե Գալոյանի օժանդակությամբ եւ միջոցով Բաբկեն Գասպարյանից առանձնապես խոշոր չափերով կաշառք ստանալու մեջ
Բաբկեն Գասպարյանին մեղադրանք է առաջադրվել Քրեական օրենսգրքի 312-րդ հոդվածի 3-րդ մասի 1-ին կետով, Գայանե Գալոյանին՝ ՔՕ 38-311-րդ հոդվածի 4-րդ մասի 2-րդ կետով, իսկ Միքայել Զադոյանին՝ ՔՕ 311-րդ հոդվածի 4-րդ մասի 2-րդ կետով: Բաբկեն Գասպարյանը ստորագրությամբ ազատ է արձակվել, իսկ մյուս երկուսը կալանքի տակ են:
Նշենք, որ գործից անջատվել է Բունիաթ Եղիազարյանի մասն ու նախաքննությունը շարունակվում է:
