Ադրբեջանական հերթական սադրանքը. հունվարի 20-ին հակառակորդը շփման գծում հայ դիրքապահների ուղղությամբ անօդաչու թռչող սարքից ականանետի արկ է կիրառել: Նույն օրը շփման գծի մեկ այլ հատվածում ադրբեջանական զինուժը եւս մեկ հարվածային անօդաչու է գործի դրել, բայց այս դեպքում ականանետի փոխարեն սովորական բաժակի մեջ կաղապարված ձեռքի նռնակ է կիրառել: Արցախում զավեշտ են համարում, որ պարբերաբար 4 մլրդ ռազմական բյուջեի մասին հայտարարող Ադրբեջանն օգտագործում է ռազմատեխնիկական միջոց, որը «դեռ 20-րդ դարում աֆղանական մոջահեդներն էին կիրառում»: Ստեփանակերտը նաեւ կարծում է, որ Բաքուն կրկին ոտնահարում է եռանախագահների միջնորդությամբ Կրակովում կայացած հանդիպման ընթացքում ստանձնած պարտավորությունները: Հավելենք, որ հակառակորդի գործողությունների արդյունքում հայկական կողմը կորուստներ չի ունեցել:
Նախագահ Սերժ Սարգսյանն աշխատանքային այցով Ֆրանսիայում է: Նա արդեն հանդիպել է Փարիզի քաղաքապետ Անն Իդալգոյի հետ: Նախանշված է նաեւ նրա հանդիպումը Ֆրանսիայի Սենատի նախագահի հետ, իսկ ֆրանսիացի պաշտոնակից Էմանուել Մակրոնին Սերժ Սարգսյանը կհանդիպի վաղը: Մեր երկրի ղեկավարը նաեւ Ստրասբուրգում կմասնակցի ԵԽԽՎ ձմեռային նստաշրջանին. այստեղ նրա ելույթը նախանշված է հունվարի 24-ին: Սերժ Սարգսյանն այստեղ կհանդիպի Եվրախորհրդի գլխավոր քարտուղարի, Մարդու իրավունքների եվրոպական դատարանի նախագահի, ինչպես նաեւ ԵԽԽՎ նորընտիր նախագահ Միքելե Նիկոլետիի հետ:
ՀՅԴ-ն արդեն ոչ պաշտոնական հանդիպում է ունեցել ՀՀԿ-ի նախագահի թեկնածու Արմեն Սարգսյանի հետ: Նաեւ պաշտոնական հանդիպում կունենան, իսկ մինչ այդ Աղվան Վարդանյանն այսօր կայացած խորհրդարանական ճեպազրույցի ժամանակ դեսպանի թեկնածությունը հետաքրքիր է որակել:
Եթե առաջարկ լինի, «Ելք» խմբակցությունը նույնպես կհանդիպի ՀՀԿ-ի թեկնածուին: Կլսեն նրան, կքննարկեն հուզող հարցերը, բայց խմբակցությունը, ամեն դեպքում, դեմ կքվեարկի Արմեն Սարգսյանի թեկնածությանը: Այստեղ նախագահի սեփական թեկնածուն ունեն եւ շարունակելու են փորձել անհրաժեշտ թվով ստորագրություններ հավաքել Արտակ Զեյնալյանի առաջադրման համար: Ինչ վերաբերում է թանկացումների հետ կապված բողոքի ակցիային. «Ելք»-ի պատգամավորները հիշեցրել են, որ փետրվարի 5-ին նորից են հավաքվելու: Վստահ են, որ ակցիան այս անգամ ավելի բազմամարդ է լինելու: Գեւորգ Գորգիսյանը նաեւ անդրադարձել է Աղվան Վարդանյանի կարծիքին, թե «Ելք» դաշինքին պակասում է ստեղծագործական մտածողությունը: Դաշնակցական պատգամավորը սա ասել էր՝ կապված «Ելք»-ի ցույցի ժամանակ «Ջորի»-ն հրելով Հանրապետության հրապարակ հասցնելուն:
Թուրքիայի զինված ուժերի Գլխավոր շտաբը շաբաթ հայտարարեց Սիրիայի Աֆրինում քրդերի զինված կազմավորումների դեմ «Ձիթենու ճյուղ» գործողություն սկսելու մասին: Շտաբի տվյալներով՝ դրան մասնակցել է 72 ինքնաթիռ, 113 թիրախներից 108-ը ոչնչացվել է: Թուրքական զինուժը չբացառեց նաեւ Աֆրին ցամաքային զորքեր մտցնելու հավանականությունը: Հունվարի 22-ին արդեն հարձակում սկսվեց: Թուրքերը հարձակվել են Աազազ քաղաքից. այն գտնվում է Սիրիայի հյուսիս-արեւմուտքում եւ թուրք զինվորականների վերահսկողության ներքո է հայտնվել նախորդ՝ «Եփրատի վահան» գործողության ընթացքում: Քրդերը պատասխան գործողությունների են դիմել: Քրդական աղբյուրների համաձայն՝ Աֆրինի շրջանում ընթացող մարտերի մեկ օրվա ընթացքում քրդերին հաջողվել է թուրքական հինգ տանկ խոցել:
Թուրքիայի նախագահը հայտարարել է, որ Աֆրինի գործողությամբ իրենց անվտանգության խնդիրն են լուծում: Էրդողանը նաեւ վստահեցրել է, որ այդ գործողության հարցով պայմանավորվածություն ունեն Ռուսաստանի հետ: Ի պատասխան՝ Աֆրինի քրդերը Մոսկվային Անկարայի հանցավոր գործընկեր են անվանել:
Լիոնում մահացել է հասարակական, քաղաքական գործիչ, արցախյան պատերազմի մասնակից Սարգիս Հացպանյանը: Նա 55 տարեկան էր: Վերջին ամիսներին նա Ֆրանսիա էր տեղափոխվել՝ բուժման նպատակով: Հացպանյանի մարմինը կտեղափոխեն Հայաստան. ընտանիքն արդեն զբաղվում է այդ հարցով: Սարգիս Հացպանյանը ծնվել է Թուրքիայում, 1980-ականներին Թուրքիայում զինվորական հեղաշրջման պատճառով Եվրոպա է մեկնել եւ հաստատվել Ֆրանսիայում: 1990 թվականից Հայաստանում էր բնակվում: Նշենք, որ 2008 թվականի փետրվարյան իրադարձություններից հետո Սարգիս Հացպանյանը կալանավորվել էր:
Ուկրաինայում հայտնաբերել են անցած տարվա նոյեմբերին առեւանգված Հայաստանի քաղաքացիներին: Լուրը Facebook-ում փոխանցել է Հայաստանի դեսպան Անդրանիկ Մանուկյանը՝ հավելելով, սակայն, որ առայժմ որեւէ մանրամասն հայտնել չի կարող: Ըստ տեղեկությունների՝ ամիսների առաջ Ուկրանիայում անհայտ անձինք առեւանգել էին գործարար Սերգեյ Մանուկյանի որդուն՝ 26-ամյա Արման Մանուկյանին եւ նրանց ազգականին՝ 25-ամյա Սամվելին: Երիտասարդներին կարողացել են գտնել գործարարի կապերի շնորհիվ:
Հունվարի 22-ին դոլարն ու եվրոն էժանացել են: Դոլարի փոխարժեքը կազմել է 481 դրամ, եվրոյինը՝ 589, ռուբլունը՝ 8 դրամ 52 լումա, ֆունտինը՝ 669 դրամ:
Հունվարի 23-ին հանրապետությունում սպասվում է առանց տեղումների եղանակ: Օդի ջերմաստիճանն էապես չի փոխվի: Երեւանում նույնպես տեղումներ չեն սպասվում: Մայրաքաղաքում գիշերը կդիտվի 0-2, ցերեկը՝ +10+12 աստիճան տաքություն:
