Պերինատոլոգիայի եւ գինեկոլոգիայի ինստիտուտի բժիշկ Դավիթ Աբովյանը, ով մեղադրվում է նույն բուժհաստատությունում թթվածնային քաղցի պատճառով վերջերս մահացած նորածնի մահվան մեջ, դեկտեմբերի 15-ից Առողջապահության նախարարի հրամանագրով ազատվել է աշխատանքից, ուղեգրվել է Ալավերդի քաղաք եւ մինչեւ 2011 թվականի մարտի 15-ն աշխատելու է «Ալավերդի» բժշկական կենտրոնում։ NEWS.am-ի թղթակցի հետ զրույցում այս մասին հայտարարեց Պերինատոլոգիայի եւ գինեկոլոգիայի ինստիտուտի տնօրեն Ռազմիկ Աբրահամյանը։
«Առողջապահության նախարարի կողմից ստեղծված հատուկ հանձնաժողովի կողմից որոշում է կայացվել այդ բժշկին ուղարկել մանկաբարձ-գինեկոլոգի կարիք ունեցող Ալավերդի քաղաք։ Ընդ որում, նրա անձնական գործերին խիստ նկատողություն է կցվել»,- տեղեկացրեց բուժհաստատության տնօրենը։
Նորածնի հայրը՝ Ալբերտ Աբգարյանն իր հերթին տեղեկացրեց, որ գործի մանրամասնները քննող վերոնշյալ հանձնաժողովի եզրակացությամբ գրավոր փաստաթուղթը միայն նախօրեին է ուղարկվել իրեն, իսկ մինչ այժմ ինքը տեղեկություններ ստացել է բանավոր կերպով։
«Գրավոր այս փաստաթղթում, սակայն, ես որոշ անհամապատասխանություններ եմ հայտնաբերել։ Այստեղ նշված է, թե իբր երեխան մահացել է ներարգանդային ինֆեկցիայի արդյունքում, այսինքն՝ այս հանձնաժողովն իրականում ոչ մի գործ չի կատարել, այլ ընդամենը վկայակոչել է կլինիկայի կողմից տրված փաստաթղթերը, որոնք կեղծված են։ Բայց ես անձամբ եմ հանդիպել Առողջապահության նախարարին, ով ասել է, որ բժիշկը միանշանակորեն մեղավոր է, նա պետք է կեսարյան հատում աներ։ Սակայն հանձնաժողովի եզակացության մեջ գրված չէ, որ եղել են կեսարյան անելու բոլոր ցուցումները, բայց դա չի արվել։ Այսինքն՝ եզրակացությունը հնարավորինս մեղմացված է»,- նկատեց մահացած նորածնի հայրը՝ միաժամանակ ավելացնելով, որ ինքն իրավիճակը պարզաբանող հարցադրումներ է պատրաստում նախարարին ուղարկելու համար։