Միացյալ Նահանգների 82-րդ եւ 101-րդ օդադեսանտային ստորաբաժանումների՝ փակ տարածության պայմաններում, իսկ ավելի կոնկրետ՝ ստորգետնյա թունելներում, մարտական գործողությունների իրականացման պարապմունքները առաջին հերթին ուղղված են Կորեայի Ժողովրդա-Դեմոկրատական Հանրապետության (ԿԺԴՀ) դեմ: Նման կարծիք NEWS.am- ի թղթակցի հետ զրույցում հայտնեց Քաղաքական եւ ռազմական վերլուծությունների ինստիտուտի ռազմական կանխատեսումների ռուսական կենտրոնի ղեկավար Անատոլի Ցիգանոկը:
Փորձագետի խոսքով՝ ամերիկյան ռազմական մասնագետները, վերլուծելով Ճապոնիայի հետ Երկրորդ համաշխարհային պատերազմում (մարտերը Օկինավա եւ Իվոձիմա կղզիների համար. խմբ.), ինչպես նաեւ Վիետնամում, Աֆղանստանում եւ Իրաքում մարտական գործողությունների փորձը, եզրակացրել են, որ զորքերին համապատասխան վարժանքներ են անհրաժեշտ ոչ միայն գետնի վրա, այլ նաեւ դրա տակ՝ ստորգետնյա թունելների պայմաններում, քանի որ ամերիկյան զինվորականների մոտ համապատասխան փորձի բացակայության պատճառով թունելների մաքրման օպերացիայում նրանք զգալի կորուստներ էին ունենում:
«Ես ենթադրում եմ, որ նրանք նախապատրաստում են այս դիվիզիաները Կորեական թերակղզում պայքարի համար: Ճիշտ է, կարծում եմ, որ ԱՄՆ նախագահը չի ցանկանա ռազմական գործողություններ սկսել Օլիմպիական խաղերի պայմաններում, իսկ ահա դրանից հետո ես լիովին թույլ եմ տալիս, որ նրանք ճապոնացիների հետ համատեղ կարող են ԿԺԴՀ-ի դեմ որոշ սադրանքների դիմել»,- նշեց Ցիգանոկը:
