Մարդու իրավունքների եվրոպական դատարանը վարույթ է ընդունել Հայկ Կյուրեղյանին բաժնում ծեծի ենթարկելու գործով գանգատը։ Այդ մասին NEWS.am-ին հայտնել է փաստաբան Երվանդ Վարոսյանը։
Նրա խոսքով, հայցը ներկայացրել էին փաստաբաններ Լուսինե Սահակյանն ու Վահե Գրիգորյանը։ Նրանք բողոքը ներկայացրել են Եվրոպական կոնվենցիայի 3-րդ հոդվածի խախտման հիմքով, Հայկ Կյուրեղյանին 2014թ. հունիսին ձերբակալելիս բռնության ենթարկելու գործով։
Հիշեցնենք, որ 2014 թվականի հունիսի 12-ին Շանթ Հարությունյանի եւ մյուսների դատաքննությունից առաջ Կյուրեղյանը բարձրացել էր մեքենայի տանիքին եւ կրակոցներ արձակել օդամղիչ ատրճանակից։ Կյուրեղյանը պնդում էր, որ ձերբակալությունից հետո ոստիկանները ծեծի են ենթարկել իրեն նախ մեքենայում, ապա ոստիկանության բաժնում։