Մանիպուլացված նորությունների զանգվածային տարածումը եւ նպատակաուղղված կեղծումները բերում են նրան, որ լրատվամիջոցների նկատմամբ վստահությունը լրջորեն սասանված է: Սա հատկապես վերաբերում է սոցցանցերում հրապարակումների նկատմամբ օգտատերերի վերաբերմունքին, ինչպիսին են Google-ը, Facebook-ը կամ Twitter-ը, հայտնում է Frankfurter Allgemeine Zeitung պարբերականը՝ ներկայացնելով Edelman Trust Barometer հետազոտության տվյալները:
Հետազոտությանը ամբողջ աշխարհից մասնակցածների 63 տոկոսը հայտարարել է, որ չի կարողանում պրոֆեսիոնալ լրագրողների նյութերը տարբերակել «ֆեյք նորություններից», քանի որ դրանք համացանցում միանման տրամադրվում են: Գերմանիայում համապատասխան հարցին այսպես է պատասխանել հարցվածների 54 տոկոսը:
Հետազոտության արդյունքները վկայում են դասական լրատվամիջոցների եւ հեղինակավոր օնլայն պարբերականների վարկանիշի բարձրացման մասին: Միեւնույն ժամանակ, հարցմանը մասնակցած գրեթե յուրաքանչյուր երկրորդ գերմանացին կարծում է, որ դասական պարբերականներն առաջնորդվում են քաղաքական մոտիվներով եւ կողմնակալ տեղեկատվություն են տալիս:
Ամբողջ աշխարհում հարցվածներից 10-ից 7-ը վախենում է, որ կեղծված նորություններն օգնում են ընտրությունների արդյունքների նպատակաուղղված մանիպուլացմանը:
Edelman Trust Barometer-ի հետազոտությանը, որն ամեն տարի անցկացվում է Դավոսում Համաշխարհային տնտեսական համաժողովից առաջ, մասնակցել է 28 երկրից ավելի քան 33 հազար մարդ: 20 երկրում գրանցվել է ընթերցողների անվստահության աճ իրենց ստացած տեղեկատվության նկատմամբ: Այս թրենդը հատկապես նկատելի է ԱՄՆ-ում:
