Կատուները լինում են աջլիկ եւ ձախլիկ, ընդ որում, աջլիկությունը առավել բնորոշ էգ կատուներին, պարզել են Բելֆաստում (Իռլանդիա) Քուինս համալսարանի կենդանաբանները, հայտնում է «Գազետա»-ն՝ վկայակոչելով Animal Behaviour ամսագիրը:
Գիտնականները հետեւել են 24 արու եւ 20 էգ կատվի վարքագծին նրանց տերերի տներում:
73 տոկոս դեպքերում կենդանիներն ուտելիքն իրենց մոտ հրելու համար օգտագործել են միեւնույն թաթը, 70 տոկոսը՝ դեպի ներքև քայլ անելով, եւ 66 տոկոսը՝ ինչ-որ բանի վրայով անցնելով: Սակայն աջ թաթը ավելի հաճախ օգտագործել են հենց էգ կատուները: Իսկ քնելիս եւ՛ աջլիկ, եւ՛ ձախլիկ կատուները պարկել են աջ եւ ձախ կողմերի վրա հավասար հաճախականությամբ:
Ուսումնասիրության հեղինակները նշում են, որ ձախլիկ կենդանիներն, որոնք ավելի ակտիվորեն օգտագործում են ուղեղի աջ կիսագունը, ավելի ագրեցիվ են եւ ավելի մեծ դժվարությամբ են հաղթահարում սթրեսը, քան աջլիկները: Գիտնականները, սակայն, դեռ չեն պարզել, թե ինչու են էգ եւ արու կատուները նախընտրում աջ կամ ձախ թաթը: