Չարբախում մեկ տարի առաջ տեղի ունեցած սպանության գործով այսօր` հունվարի 24-ին, ցուցմունք տվեց վկա Արամ Պետրոսյանը: Ցուցմունք տալուց առաջ նա դատարանին հարց ուղղեց. «Հիմա ինչ, այսինքն` էլի կասկածվում եմ հանցագործության մեջ»: Դատարանը նրան պարզաբանեց, որ դատարան է հրավիրվել որպես վկա ցուցմունք տալու:
Արամ Պետրոսյանը նշեց, որ ամբաստանյալներից ճանաչում է Պետրոս Իսրայելյանին, որն իր ընկերն է. «Մենք ընկերություն չենք արել է, այլ ախպերություն»:
Նա պատմեց, որ հաճախ են հավաքվել Պետրոս Իսրայելյանին պատկանող գեղեցկության սրահի նկուղային հարկում գտնվող տարածքում, նրա խոսքով, դա եղել է իրենց «տունը»: Նրա խոսքով, ամեն ինչ սկսվել է, երբ Արա Վարդանյանը` «Ճըվճվ Արոն», խնդրել է Գեղամին (Պետրոս Իսրայելյանին) Վարդենիսցի Վահագնից վերցնել պարտքը` 2 հազար դոլարը: Նրա խոսքով, Ճըվճվ Արոյի ընկերը` Մուշեղ Մուշեղյանն, ավելի ուշ պնդել է, թե Վարդենիսցի Վահագնը ոչ թե 2 հազար, այլ 20 հազար դոլար է պարտք:
«Դեպքից մի չորս օր առաջ նստած ենք եղել, Գեղամն ասեց, որ փողի հետ կապված խնդիր կա, մեկը ճըվճվին 20 հազար դոլար է պարտք: Ասաց` ախպեր ջան ինքնասիրության հարց է դարձրել, 20 հազար տվել ա, 18 հազար հետ են տվել, հիմա 2 հազար դոլար պետք է տա, բայց 20 հազար են հետ ուզում: Ասաց`Մուշեղը կոնկրետ մեր հետեւից ա ընկել: Ես էլ վերցրի զանգեցի Մուշեղին` ասել եմ` տվողն էլ գիտի ինչքան պիտի տա, վերցնողն էլ գիտի` ինչքան պիտի ստանա: Մուշեղն էլ ասաց` դե որ տենց ա` արի իրար տենանք: Իրա խոսալը գիտեք ինչ ձեւի էր` ապեր ջան լսում ես ինչ եմ ասում, ուրեմն սենց…ագրեսիվ էր շատ»,-պատմեց նա:
Վկան նշեց, որ հաջորդ օրը զանգել եւ գնացել է Մուշեղ Մուշեղյանի հետ հանդիպման. «Հաջորդ օրը զանգեցի իրան, ասաց` ախպեր Բանգլադեշ եմ, արի ստեղ կտեսնենք իրար: Գեղամն ասաց` մենակ գնում ես էնտեղ, արի ես էլ հետդ գամ, որ հանկարծ չծեծեն: Մի քանի հոգով ենք գնացել, երկու ավտոյով ենք գնացել: Մուշեղի տեղը չգտանք, զանգեցի, ասացի` արի մեր տուն` նկուղային տունը, բացատրեցի հասցեն: Նստած էինք` ուժեղ ձայն լսվեց` Մուշեղն էր, տենց ուժեղ դուռը բացեց: Գեւորգն էլ կանգնած էր էդտեղ, ասաց` սա մեր դռան դուռն է, ինչի ես տենց բացում դուռը: Գեւորիկի հետ երկու բերան խոսակցություն եղավ, սկսեց մեր քրֆել, Գեւորիկն էլ նրան մեր քրֆեց: Մուշեղը պատրաստված եկել էր, ձեռը գցեց հետեւը, զենքը հանեց ու Գեւորի ուղղությամբ կրակեց: Գեւորն էլ ընկավ, փաթաթվեց նրան, հետո քաշքշոց եղավ: Դեմս սիգարտեի տուփ կար, վերցրի ու շպրտեցի վրան: Հետո թեւիս տակ ուժեղ ցավ զգացի, ու բան չեմ հիշում: Հետո Գեղամի ձայնը լսեցի, ասում էր` օգնեք Արամին, խփել են»:
Վկան նշեց, որ իրեն տեղափոխել են Երեւանի «Սուրբ Աստվածամայր» հիվանդանոց, որտեղ աչքերը բացել է եւ տեսել Մուշեղ Մուշեղյանին. «Կողքս պառկած էր, աչքերս բացի, տեսա` կողքս ա: Հելա տոնածառի խաղալիքի նման ութ հատ շլանգ էր դուրս եկել վրիցս, նենց էր կրակել` սիրտ, թոք, սաղ իրար էին խառնվել: Հետո լսել եմ, որ մահացել են Մուշեղն էլ, Գեւորիկն էլ»:
Դատարանի հարցին` ինչով է պայմանավորված նախաքննության ընթացքում տված հակասական ցուցմունքները, վկան պատասխանեց. «Փորձել եմ նախաքննությանն օգնել, իմ ընկերն անմեղ է, բռնել նստացրել են»:
Նշենք, որ ի սկզբանե Արամ Պետրոսյանն այս քրեական գործով տուժողի կարգավիճակում է եղել:
Մեղադրողը միջնորդությամբ հանդես եկավ` վկայի նախաքննական ցուցմունքը հրապարկելու մասին: Դատարանը բավարարեց միջնորդությունը` վկայի` որպես տուժողի նախաքննականց ցուցմունքները հրապարակելու մասին:
Ըստ նախաքննական ցուցմունքի`2016թ. նոյեմբերի 13-ին Գեղամի վարսավիրանոցի դիմաց վկան մի քանի անծանոթ անձ է տեսել, որից հետո մտել է նկուղային հարկ:
«Ես անմիջապես մտա նկուղային սենյակ, դռան մոտ չհասած Գեղամի ձայնը լսեցի, մտնելով ներս` տեսա 25-20 անձի: Ճանաչեցի Աբոյին, Գեւորիկին, Գեղամին, որը մեր բակից էր: Լսեցի տարբեր տեսակի հայհոյանքներ, տեսա որ մի տղա վազեց դեպի դուռը: Գեւորգը եւ մի քանի անծանոթներ հարվածեում էին նրան, հետո էդ տղան սկսեց կրակել, հետո փորիս հատվածում ուժեղ ցավեր զգացի, էլ բան չեմ հիշում: Հետո ուշքի եկա, տեսա որ սեւ ակնոցով մարդիկ Գեւորիկին ու Մուշեղին դուրս տարան, ինձ ոչ ոք չէր օգնում: Հետո Գեղամի կինը ինձ օգնեց: Հետո հիվանդանոցում Մուշեղին եմ տեսել` կողքիս պառկած,ինչ-որ մարդիկ լացում էին վրան»:
Նախաքննական լրացուցիչ ցուցմունքում նույն հանգամանքի վերաբերյալ վկան պատմել է. «Տաքսիից իջա, տեսա, որ գեղեցկության սրահի մոտակայքում 15-20 անձ է հավաքված եղել: Մտնելով նկուղային սենյակ, տեսա 7-8 հոգի, տեսա Գոռիկին, Գեւորգին, որքանով տպավորվել է տեսել եմ Արմանին եւ Արսենին: Մնացծին չեմ ճանաչել: Գոռին հարցրի` Գեղամը որտեղ է, Գոռն ասաց` հիմա կգա: Շքամուտքի մոտից մտավ Մուշեղը` ուժեղ դուռը բացելով: Գեւորգն ասաց` ինչ ես անում արա, Մուշեղն էլ ասաց` դու պիտի ասես ինչ անեմ, որից հետո հնչեցին հայհոյանքներ: Հետո Մուշեղը հանեց զենքը եւ կրակեց Գեւորգին, որից հետո դանակով Գեւորգը հարվածեց նրան: Այդ ժամանակ ես ծխախոտի տուփը վերցրի ու նետեցի Մուշեղի ուղղությամբ, նա էլ իմ վրա կրակեց»:
Հարցին` նախկինում հայտնել է, թե տեսել է` ինչպես է Պետրոս Իսրայելյանը դեպքից մի քանի րոպե առաջ բազմոցի մոտ նստած զրուցել Մուշեղ Մուշեղյանի հետ, վկան պատասխանել է. «Նարկոզի արդյունք է եղել»:
Նշենք, որ 2016թ. նոյեմբերի 13-ին տեղի ունեցած հրաձգության հետեւանքով մահացել են 25-ամյա Գեւորգ Ավետիսյանը եւ 30-ամյա Մուշեղ Մուշեղյանը: Պետրոս Իսրայելյանին մեղադրանք է առաջադրվել Քրեական օրենսգրքի 104-րդ հոդվածի 2-րդ մասի 7-րդ կետով, Ալիկ Բանդուրյանին («Նորատուսցի Ալիկ»)՝ Քրեական օրենսգրքի 38-112-րդ հոդվածի 2-րդ մասի 6-րդ կետով, Արմեն Գասպարյանին («Բդո»)՝ Քրեական օրենսգրքի 335-րդ հոդվածի 1-ին մասով:
