Հայաստանը ստանձնել է ղարաբաղյան հակամարտությունը միայն խաղաղ միջոցներով լուծելու պարտավորությունը: Այս մասին Եվրոպայի խորհրդի խորհրդարանական վեհաժողովի (ԵԽԽՎ) ձմեռային նստաշրջանում իր ելույթի ժամանակ հայտարարել է Հայաստանի Հանրապետության նախագահ Սերժ Սարգսյանը:
Նրա խոսքով՝ Հայաստանը կօգտագործի Ղարաբաղի վրա իր ազդեցությունը հակամարտության կարգավորմանը աջակցելու համար: Չնայած ԵԽԽՎ-ն ղարաբաղյան հակամարտության կարգավորման հարթակ չէ՝ նախագահը կառույցի անդամներին կոչ է արել կանխել կողմնակալ հայտարարությունների հնարավոր բացասական հետեւանքները հակամարտության գոտում փխրուն անվտանգության պահպանման համար:
«Արցախը շարունակում է ժողովրդավարություն կառուցել, ամրապնդել մարդու իրավունքների պաշտպանությունը: Հայաստանը Արցախին լիակատար աջակցություն կցուցաբերի: Եվրոպայում գորշ տարածքներ չպետք է լինեն, երբ խոսքը մարդու իրավունքների պաշտպանության մասին է»,- ասել է նա:
ՀՀ նախագահը ներկայացրել է ղարաբաղյան հակամարտության պատմությունը` հայտարարելով, որ Բաքվի իշխանություններն ամեն ինչ արեցին հայերին իրենց պատմական բնակավայրերից արտաքսելու համար: «Հակամարտությունը պահանջում է հարգել հրադադարի ռեժիմը: Կարգավորումը պետք է լինի խաղաղ, եւ մենք պետք է հաղթահարենք արդարության պակասը»,- ասել է Սարգսյանը` հավելելով, որ անկախ նրանից, թե որտեղ նա կհայտնվի, հանդես կգա Ղարաբաղի ինքնորոշման իրավունքի պաշտպանության օգտին:
ՍԵրժ Սարգսյանը ավելացրել է, որ ԵԱՀԿ Մինսկի խումբը միջազգային մակարդակով համաձայնեցված միակ բանակցային ձեւաչափն է, եւ միջազգային հանրությունը, այդ թվում նաեւ Եվրախորհուրդը, հաստատել է իր աջակցությունը: Սակայն Ադրբեջանը պատրաստ չէ զիջումների գնալ, նշել է նախագահը` տեղեկացնելով ագրեսիայի մասին, որը տեղ էր գտել 2016 թվականի ապրիլին եւ ուղեկցվել էր միջազգային մարդասիրական իրավունքի խախտումներով «Սա ուժեղ հարված էր բանակցություններին, որը սարսափելի հիշողություններ արթնացրեց Սումգայիթի մասին»,- ընդգծել է Սերժ Սարգսյանը: