Երեւանի Ավան եւ Նոր Նորք վարչական շրջանների ընդհանուր իրավասության դատարանում այսօր՝ հունվարի 24-ին, «Սասնա ծռեր-2»-ի գործով դատական նիստին դատավոր Մեսրոպ Մակյանը պաշտպան Դավիթ Գյուրջյանին չթույլատրեց տեսակցել Գագիկ Եղիազարյանին եւ դրանից հետո ներկայացնել միջնորդություն։ Դատավորը պատճառաբանեց, որ Գագիկ Եղիազարյանն այսօր հեռացված է դատական նիստից իր պահվածքի պատճառով եւ պաշտպանը Գագիկ Եղիազարյանին կարող է տեսակցել քրեակատարողական հիմնարկում։
«Ձեր պաշտպանյալին տեսակցեք, խորհրդակցեք, այնուհետեւ ներկայացրեք ձեր միջնորդությունը, այստեղ հնարավոր չէ տեսակցել»,- ասաց դատավոր Մեսրոպ Մակյանը։
Նշենք,որ այսօր դատարանում հրապարակվում են գործում առկա գրավոր նյութերը, ինչից հետո պաշտպանները հանդես կգան հայտարարությամբ։
Հիշեցնենք, որ «Սասնա ծռեր» խմբի գործով դատաքննությունը մի քանի ամիս շարունակ չէր սկսվում, նիստերն անընդհատ տապալվում էին, որից հետո որոշում կայացվեց գործը բաժանել 3 մասի: «Սասնա ծռեր» խմբի 11 անդամի մասով գործը քննում է Արտուշ Գաբրիելյանը Ավան եւ Նոր Նորք վարչական շրջանների ընդհանուր իրավասության դատարանում, իսկ անջատված մասերով երկու գործերը քննում են Կենտրոն եւ Նորք-Մարաշ վարչական շրջանների ընդհանուր իրավասության դատարանից գործուղված Մեսրոպ Մակյանն ու Էրեբունի եւ Նուբարաշեն վարչական շրջանների ընդհանուր իրավասության դատարանի նախագահ Արթուր Օհանյանը: