Հայաստանում մեծ աշխատանք է կատարվել կոռուպցիան արմատախիլ անելու ուղղությամբ, բայց ցավով պետք է արձանագրեմ, որ մեր աշխատանքները շատ մեծ արդյունք չեն տվել: Այս մասին, այսօր՝ հունվարի 24-ին, ԵԽԽՎ-ում հարցուպատասխանի ժամանակ նշել է ՀՀ նախագահ Սերժ Սարգսյանը:
Նրա խոսքով, այդ զազրելի երեւույթը գոյություն ունի նաեւ Հայաստանում. «Մենք նախորդ տարի օրենք են ընդունել եւ կոռուպցիան կանխարգելելու հանձնաժողով ենք ստեղծել, այդ օրենսդրությունն ամբողջովին համապատասխանում է եվրոպական չափանիշներին: Հանձնաժողովի անդամներին պետք է ընտրեն մեր խորհրդարանականները ապրիլի 9-ից հետո, երբ ամբողջովին ուժի մեջ կմտնեն նոր սահմանադրության դրույթները: Մենք ընդունել ենք օրենք ազդարարության եւ ազդարարության պաշտպանության մասին, քրեականացրել ենք ապօրինի հարստացումը: Եթե հիշողությունս չի դավաճանում, Հայաստանում մոտ 500 պաշտոնյաներ պետք է հայտարարագրեն իրենց եկամուտներն ու գույքը, ինչը փոքր Հայաստանի համար հսկայական թիվ է»,-ասաց Սերժ Սարգսյանը:
Նա ընդգծեց, որ Հայաստանում ձեւավորվել է քաղաքացիական հասարակություն եւ այդ հասարակությունն էլ իր ներդրումն է բերում այդպիսի հանցագործությունները բացահայտելու եւ կանխարգելելու ուղղությամբ. «Ինչ վերաբերում է պատիժներին, ամեն տարի հայաստանում անգամներով ավելի շատ քրեական գործեր են հարուցվում եւ դատավճիռներ են կայացվում կապված կոռուպցիոն հանցագործությունների հետ»,-ասաց ՀՀ նախագահը:
