Դամասկոսում Հայաստանի դեսպանությունը փորձում է ստույգ տվյալներ պարզել Աֆրինում հայի տան գնդակոծման վերաբերյալ։ Այդ մասին NEWS.am-ին հայտնեց ՀՀ ԱԳ նախարարի մամուլի քարտուղար Տիգրան Բալայանը։ 

Նրա խոսքով, խիստ նախնական տեղեկություններ կան, որ ռազմական գործողությունների ընթացքում ռումբ է ընկել մի հայի տան վրա։ Այդ տեղեկությունները, սակայն, դեռ խոսակցությունների մակարդակի են, դեսպանատունը գործակցում է նաեւ տեղի հայ համայնքի ներկայացուցիչների հետ՝ պարզելու տեղեկության իսկությունը։ «Այս պահին նաեւ համայնքի ղեկավարությունը ստույգ տեղեկությունների չի տիրապետում։ Հավելյալ տեղեկություններ տեղեկություններ ստանալուն պես լրացուցիչ կհայտնենք»,- նշել է Բալայանը։ 

Նշենք, որ նախնական, առայժմ չճշտված տեղեկությունների համաձայն, Աֆրինում քրդերի դեմ թուրքական գործողությունների ընթացքում ռումբ է ընկել մի տան վրա, որը պատկանել է հայի։ 

Նշենք, որ Թուրքիան հունվարի 20–ին նախաձեռնել է Աֆրին ներխուժման գործողությունը, որին առաջնագծում մասնակցում են թուրքական հովանավորութմաբ ստեղծված տարբեր զինված խմբավորումները։ Թուրքական կանոնավոր բանակի ուժերը 2–րդ գիծ են առաջ շարժվում։ Նշենք, որ թուրքական պաշտոնական տեղեկությունների համաձայն թուրքական կանոնավոր բանակը տվել է 3 սպանված։