Ադրբեջանի զինուժն այս գիշեր դիվերսիոն ներթափանցման փորձ է արել ու կորուստներով հետ շպրտվել: Արցախի պաշտպանության բանակի ձեռնարկած կանխարգելիչ գործողությունների արդյունքում ադրբեջանական հատուկ ջոկատայինները հետ են շպրտվել:
Դիվերսիոն փորձի մասին այլ մանրամասներ այս պահին հայտնի չեն: Տեղի ունեցած իր ֆեյսբուքյան էջում արձագանքել է Արցախի մարդու իրավունքների պաշտպան Ռուբեն Մելիքյանը. նրա գնահատմամբ, դիվերսիոն փորձը պատասխան էր Սերժ Սարգսյանի`նախորդ օրը ԵԽԽՎ-ում ադրբեջանցիներին ուղղված կոչին՝ հանգստացեք: Հայաստանի արտաքին գործերի նախարարի մամուլի խոսնակ Տիգրան Բալայանն էլ գրել է, որ Բաքուն ուշադրությունը շեղելու համար շփման գծում դիմել է սադրանքի:
Մինչ վարչապետը Դավոսում մասնակցում է Համաշխարհային տնտեսական համաժողովին, Վաչե Գաբրիելյանն այսօր Երեւանում անցկացրել է Կառավարության հերթական նիստը: Ինչպես սպասվում էր, նիստն անցել է բավականին ձանձրալի մթնոլորտում: Կառավարությունն այսօր որոշել է մարտին 4 օր հանգստանալու հնարավորություն տալ հայաստանցիներին: Մարտի 9-ի փոխարեն կաշխատենք մարտի 17-ին, իսկ մարտի 8-11-ը ներառյալ կլինեն ոչ աշխատանքային օրեր: Նիստի «բնականոն» ընթացքը կարելի է ասել խախտվել է միայն Ազգային վիճակագրական ծառայության վերաբերյալ որոշումը ներկայացնելիս: Արդարադատության նախարար Դավիթ Հարությունյանը հայտարարեց, որ ԱՎԾ-ն դառնում է Կոմիտե, սա միանշանակ դուր չեկավ Ծառայության պետ Ստեփան Մնացականյանին: Փոխվարչապետը հորդորեց նախ եւ առաջ հայկական ավանդույթները չմոռանալ: Հնչեցված մեղադրանքներին արձագանքեց նաեւ Դավիթ Հարությունյանը:
Արդարադատության նախարարությունն առաջիկայում եւս մեկ կարեւոր օրինագիծ կներկայացնի, որի ընդունման դեպքում ապրիլին ձեւավորվելիք նոր կառավարությունը կունենա վարչապետ, առաջին փոխվարչապետ, երկու փոխվարչապետներ եւ նախարարներ: Մամուլում լուրեր են շրջանառվում, որ առաջին փոխվարչապետի պաշտոնը «ստեղծվել» է Կարեն Կարապետյանի համար:
Այսօրվանից Երեւանում գործում է 1 ընդհանուր իրավասության դատարան: Այն ունի 3 նստավայր, որտեղ քննվում են քրեական գործերը, մյուս շենքերում կքննվեն միայն քաղաքացիական եւ վարչական գործերը: Մայրաքաղաքի 1 ընդհանուր դատարանի նախագահի ժամանակավոր պաշտոնակատար է նշանակվել Ռուբեն Վարդազարյանը: Ուժի մեջ մտած այս օրենսդրական կարգավորումն այսօր կաթվածահար էր արել դատարանների աշխատանքները: Բանն այն է, որ բոլոր վարչական շրջանների ընդհանուր իրավասությունների դատարանների նախագահների գործունեությունը դադարեցվել է, նրանք չեն կարողացել նիստեր անել:
Գործարարներ Ռուբեն Վարդանյանի ու Սամվել Կարապետյանի ընկերությունները ներառվել են Forbes-ի «Ռուսաստանի անշարժ գույքի թագավորները-2018» վարկանշում: Ցուցակի 3-րդ տեղում ռուսաստանցի գործարար Սամվել Կարապետյանի «Տաշիր» ընկերությունների խումբն է, որը նախորդ տարի վարձակալությունից միայն ստացել է 650 մլն դոլար: Վարկանշի 28-րդ տեղում Ռուբեն Վարդանյանի եւ Գագիկ Ադիբեկյանի RD Group-ն է: Ռուբեն Վարդանյանի հիմնադրամների հետ համատեղ ընկերությանն է պատկանում մոտ 1 միլիարդ արժողությամբ առեւտրային անշարժ գույքի պորտֆելը:
Աֆրինում քրդերի դեմ թուրքական գործողությունների ընթացքում հայ է վիրավորվել. այս տեղեկությունը հաստատել է Դամասկոսում Հայաստանի դեսպանատունը: Նախնական տեղեկություններով, Աֆրինում ռումբ է ընկել մի տան վրա, որը պատկանել է հայի։ Մինչեւ պատերազմական գործողությունները Աֆրինում բնակվել են մեծ թվով հայեր, հայաբնակ է եղել նաեւ հարեւանությամբ գտնվող Ազազ գյուղը: Այս պահին Աֆրինում ու Ազազում հայեր չեն բնակվում, իսկ հայկական եկեղեցիներն ու մշակութային տները ավերված են:
Վայոց ձորի մարզում այսօր ողբերգական վթար է տեղի ունեցել: Ելփին-Չիվա ավտոճանապարհին բեռնատարը դուրս է եկել ավտոճանապարհի երթեւեկելի հատվածից եւ կողաշրջվել, ինչի հետեւանքով վարորդն ու ուղեւորը տեղում մահացել են:
«Զանգեզուր» պետական արգելավայրում բեզոարյան այծ է սպանվել: Բնապահպանության նախարարության հաղորդմամբ, տեղամասի տեսուչը կրակոցի ձայն է լսել Աջաբաջ բնակավայրի հարակից տարածքում, որից հետո ահազանգել տնօրինությանը: ՊՈԱԿ-ի աշխատակիցները տարածքը սանրելուց հետո հայտնաբերել են սպանված մեկ բեզոարյան այծ, որին չէին հասցրել մորթազերծել։ Որսագողին դեռ չեն գտել:
Հունվարի 25-ին դոլարի անկումը շարունակվել է, իսկ եվրոն երկու օրում թանկացել է ավելի քան 8 դրամով: Դոլարի փոխարժեքը կազմել է 480 դրամ, եվրոյինը՝ 597, ռուբլունը՝ 8 դրամ 61 լումա, ֆունտինը՝ 686 դրամ:
Հունվարի 25-ին եւ 26-ին հանրապետության շրջանների զգալի մասում սպասվում են տեղումներ, այդ թվում ձյան եւ ձնախառն անձրեւի տեսքով: Օդի ջերմաստիճանը 26-ից աստիճանաբար կնվազի 4-5 աստիճանով: Մայրաքաղաքում նույնպես ժամանակ առ ժամանակ սպասվում են թույլ տեղումներ:
