Մեր բանակը միշտ պատրաստ է պատասխանել հայրենիքի նկատմամբ ցանկացած ոտնձգության: Այս մասին նշված է Բանակի օրվան նվիրված ՀՀ վարչապետ Կարեն Կարապետյանի շնորհավորական ուղերձում:
Ուղերձում, մասնավորապես, ասվում է.
««Հարգելի հայրենակիցներ,
Սրտանց շնորհավորում եմ բոլորիս՝ այս կարեւորագույն տոնի կապակցությամբ:
Մենք առաջին հերթին երախտագիտությամբ հիշում ենք բոլոր նրանց, որոնք կանգնած են եղել Հայոց բանակի ստեղծման ակունքներում եւ նրանց, ովքեր զոհաբերեցին իրենց կյանքը մեր անկախության եւ մեր հաղթական բանակի կերպարը կերտելու համար:
Հայոց բանակի կազմավորումը տեղի է ունեցել մեր անկախ պետականության ամենածանր տարիներին՝ պարտադրված պատերազմի պայմաններում, եւ այսօր հպարտությամբ ենք նշում, որ մեր Զինված ուժերն էին Հայաստանի անկախության առաջին ու գլխավոր ձեռքբերումը:
Այսօր անհնար է գերագնահատել Հայոց բանակի դերն ու նշանակությունը: 2016թ. ապրիլին, երբ հակառակորդի կողմից Արցախի նկատմամբ տեղի ունեցավ լայնածավալ ռազմական ագրեսիան, մեր բանակը կրկին ապացուցեց իր մարտունակությունը՝ ցույց տալով, որ միշտ պատրաստ է պատասխանել մեր հայրենիքի նկատմամբ ցանկացած ոտնձգության: Այսօր մենք հպարտությամբ ենք հիշում այն քաջ տղաներին, ովքեր իրենց վրա վերցրեցին այդ հարվածը:
Բոլոր զինծառայողներին մաղթում եմ քաջառողջություն, երջանկություն եւ բարի ծառայություն` ի բարօրություն Հայաստանի Հանրապետության»: